Туркманистон президентининг отаси мияга қон қуйилиши туфайли вафот этгани маълум бўлди

Туркманистон президенти Гурбангули Бердимуҳамедовнинг отаси Маликгули Бердимуҳамедов мияга қон қуйилиши оқибатида вафот этган. Бу ҳақда «Хроника Туркменистана» газетаси хабар берди.

Хабарга кўра, сўнгги вақтларда президентнинг отаси оғир касал бўлган ва Аҳал вилояти, Гиёҳтепа этрапидаги Аба Аннаев қишлоғида қизларидан бирининг уйида яшаган. Қишлоқ ҳозирги туркман элитаси яшайдиган замонавий турар-жой мажмуаси бўлиб, президентнинг от боқиш фермасидан унча узоқ бўлмаган ҳудудда жойлашган.

Газетанинг маълум қилишича, 18 апрель куни эрталаб соат 10:00 да Маликгули Бердимуҳамедов ҳушидан кетган. Посёлкада жойлашган махсус клиниканинг шифокорлари, пойтахтдаги тиббиёт муассасалари профессорлари, шу жумладан, тиббиёт университети ўқитувчилари ва тасдиқланмаган хабарларга кўра, Германиядан келган мутахассис ҳам беморнинг юрак уришини бир неча соат сақлаб тура олган. Барча зарур реанимация чоралари қўлланилганига қарамай, мия фаолияти тикланмаган. Соат 14:30 да шифокорлар беморнинг ўлими ҳақида маълум қилган.

Таъкидланишича, Маликгули Бердимуҳамедовнинг ўлими тўғрисида барча ташкилий ишлар, шу жумладан, хавфсизлик билан боғлиқ масалалар ҳал қилинмагунча хабар берилмаган. Гап чегараларни ёпиш, полиция ва ҳарбийларни сафарбар этиш ҳақида кетаётган бўлиши мумкин. Хабарга кўра, шу куни Туркманободда маҳаллий полиция кучайтирилган хавфсизлик режимига ўтказилган.

Дафн маросими эртаси куни Аҳал вилояти, Гиёҳтепа этрапи, Изгант қишлоғидаги аждодлар қабристонида бўлиб ўтган.

Эслатиб ўтамиз, Туркманистон президенти Гурбангули Бердимуҳамедовнинг отаси Маликгули Бердимуҳамедов 89 ёшида вафот этди.

Маликгули Бердимуҳамедов мамлакат Ички ишлар вазирлиги органларида ишлаб, Тошҳовуз, Мари, Ашхобод шаҳарларида турли лавозимларни эгаллаган. 1982 йилда подполковник унвони билан истеъфога чиққач, кўп йиллар давомида таълим соҳасида ишлаган.

2012 йил февралида Туркманистон Мажлиси (парламенти) қарори билан пойтахтдаги 1001-сонли ҳарбий қисмга Маликгули Бердимуҳамедов номи берилган эди.

2017 йилда Маликгули Бердимуҳамедов номидаги медал таъсис этилган ва шу йили давлат раҳбари ўз отасига ва унинг ИИВдаги фаолиятига бағишланган «Мардлар Ватанни улуғлайди» китобини тақдим этган эди.