Jo Bayden amerikaliklarga 1,8 trillion dollarlik yordam rejasini taqdim etdi va boylar uchun soliqlarni oshirish taklifini berdi

AQSh prezidenti Jo Bayden prezidentlik faoliyatiga 100 kun to‘lishi arafasida Kapitoliyda Kongressga birinchi marta murojaat qilib, nutq so‘zladi. Bu haqda Reuters xabar berdi.

Nashrning ma’lum qilishicha, Bayden mamlakatdagi oilalarga 1,8 trillion dollarlik yordam rejasini taqdim etdi, bu tashabbusni boylar uchun soliq stavkalarining oshirilishi evaziga moliyalashtirish ko‘zda tutilgan.

Rejaga ko‘ra, o‘n yil davomida bir trillion dollar ta’lim va bolalar parvarishi sohalariga, yana 800 milliard dollar o‘rtacha va past daromadli oilalar uchun soliq imtiyozlariga yo‘naltiriladi.

Bayden eng boy amerikaliklar uchun soliqlar chegarasini 37 foizdan 39,6 foizgacha oshirishni taklif qildi. Associated Press’ning yozishicha, soliqlarni oshirish 10 yil davomida 1,5 trillion dollar to‘plashga yordam beradi. Avvalroq Bayden yillik maoshi 400 ming dollardan kam bo‘lgan aholiga soliq stavkalarining o‘sishi ta’sir ko‘rsatmasligiga va’da bergan edi.

Shuningdek, Bayden o‘z nutqida AQSh fuqarolarini prezident va uning ma’muriyati uchun asosiy strategik raqib bo‘lgan Xitoy raqobatiga qarshi turishga chaqirdi.

2021-yilning mart oyida AQSh Kongressi mamlakat iqtisodiyotiga aksariyat aholi uchun 1400 dollarlik to‘g‘ridan to‘g‘ri to‘lovlarni taqdim etuvchi 1,9 trillion dollar miqdorida mablag‘ ajratish rejasini tasdiqladi.

29-aprel kuni Jo Baydenning prezidentlik lavozimini egallaganiga 100 kun to‘ldi.

Ma’lumot uchun, AQSh prezidenti Jo Baydenning reytingi faoliyatining birinchi 100 kunida 52 foizni tashkil qildi. 1945-yildan buyon bu ko‘rsatkich faqat Jerald Ford (48 foiz) va Donald Trampda (42 foiz) pastroq bo‘lgan.

Avvalroq Jo Bayden davlat xizmatchilarining eng kam ish haqini soatiga 15 dollargacha ko‘tarishni nazarda tutuvchi farmonga imzo chekdi.

Jo Bayden iyun oyida davlat rahbari sifatida birinchi bor chet elga safar qilishi haqida xabar berildi. U Buyuk Britaniya va Belgiyaga boradi. Uning chet el rahbari bilan birinchi telefon suhbati 23-yanvar kuni Kanada bosh vaziri Jastin Tryudo bilan bo‘lib o‘tdi. Bir necha kundan keyin Bayden Putin bilan telefonda gaplashdi, suhbat taxminan yarim soat davom etdi.

Shuningdek, Oq uy Rossiyaga qarshi kiritilgan sanksiyalarning natijalariga baho berdi va ularni hozircha prezident Jo Bayden ma’muriyati kutgan natijalarga “juda yaqin”, deb atadi.