1 май куни Ўзбекистон Президенти Шавкат Мирзиёев ва Қирғизистон президенти Садир Жапаров телефон орқали мулоқот қилди, деб хабар беради Президент матбуот хизмати.
Маълум қилинишича, суҳбатда куни кеча ўтган мулоқотлар давоми сифатида икки давлат раҳбарлари Қирғизистон—Тожикистон чегарасидаги вазиятнинг ривожланишини муҳокама қилган.
Ўз вақтида кўрилган ва ўзаро мувофиқлашган саъй-ҳаракатлар туфайли давлат чегараси қисмидаги вазиятни барқарорлаштиришга эришилгани ва унинг кескинлашишига йўл қўйилмагани катта мамнуният билан қайд этилган.
«Ўзбекистон ва Қирғизистон етакчилари Марказий Осиё минтақасидаги барча масалаларни биродар мамлакатлар ва халқлар ўртасида дўстлик, яхши қўшничилик ва шериклик муносабатларини мустаҳкамлаш мақсадида конструктив ва ишончга асосланган мулоқот орқали биргаликда ҳал қилиш борасида қатъий эканликларини яна бир бор таъкидладилар», — дейилади хабарда.
Эслатиб ўтамиз, Қирғизистон ва Тожикистон чегарасидаги низо Исфара дарёси юқори оқимларидаги «Головной» сув тақсимлаш пункти яқинида бошланди, мазкур жойни иккала давлат вакиллари ҳам ўзлариники деб ҳисоблайди. 29 апрелда икки давлат ҳарбийлари ўртасида отишма содир бўлган. 30 апрель куни Қирғизистон президенти Тожикистон билан чегарадаги вазият барқарорлашганини маълум қилди. Қирғизистон Соғлиқни сақлаш вазирлигининг сўнгги маълумотларига кўра, можарода жабрланганлар сони 134 кишига етди, 13 киши вафот этди.
30 апрель куни Шавкат Мирзиёев Садир Жапаров билан Қирғизистон—Тожикистон чегарасидаги вазиятни тез фурсатда ҳал этишни муҳокама қилган. Шунингдек Ўзбекистон Президенти Қирғизистон президенти билан телефон суҳбатида март ойида «Тошкентда қабул қилинган мажбуриятларни сўзсиз бажариш муҳим»лигини қайд этган.
Изоҳ (0)