Тошкент вилоятининг Бўстонлиқ туманида 10 гектар ерни қарийб 2 миллион долларга сотмоқчи бўлган шахслар ушланди, деб хабар беради вилоят ИИББ ахборот хизмати.
Маълум қилинишича, 19 апрель куни С.Х. ва Х.С. исмли фуқаролар Ички ишлар вазирлигига ариза билан мурожаат қилиб, Муҳаммаджон исмли шахс Бўстонлиқ туман ҳокимининг инвестиция киритиш шарти билан ажратилган 10 гектар ер майдонини 1,9 миллион долларга ҳокимлик орқали ҳужжатлаштириб бериш орқали сотмоқчи эканини билдирган. Ушбу ер майдони «Навобод» маҳалласи ҳудудида жойлашган бўлиб, «Ал-Инобат» МЧЖга тегишли оромгоҳ ва балиқчилик кўли ташкил қилиш учун ажратилган.
Фуқаролар «сотувчи» айтилган пулнинг 50 минг долларини талаб қилаётгани ва унга нисбатан қонуний чора кўришни сўраган.
Мазкур аризага асосан, 23 апрель куни ИИВ Коррупция ва иқтисодий жиноятларга қарши курашиш бошқармаси ходимлари ҳамда Бош прокуратура ҳузуридаги департаментнинг Тошкент вилояти бошқармаси ходимлари ҳамкорлигида тезкор тадбир ўтказилган.
Тадбир давомида давомида, 6 нафар шахс Тошкент шаҳри Чилонзор тумани 4-мавзе 65-уй олдидаги автотураргоҳда назоратдаги ариза муаллифларидан 50 минг АҚШ доллари олган вақтида ашёвий далиллар билан ушланган.
Мазкур ҳолат юзасидан Бош прокуратура ҳузуридаги департаментнинг Тошкент вилояти бошқармаси томонидан Жиноят кодексининг 168-моддаси (фирибгарлик) 4-қисми «а» банди билан жиноят иши қўзғатилиб, дастлабки тергов ҳаракатлари олиб борилмоқда.
Аввалроқ Навоийда ўзганинг ер майдонини 47 миллион сўмга сотиб юбормоқчи бўлган шахс қўлга тушгани, Андижонда 6 гектар ерни 18 минг долларга сотмоқчи бўлган фермер хўжалиги раҳбарига жиноят иши қўзғатилгани, Тўрткўлда фуқарога 30 миллион сўмга 10 гектар ер олиб беришни ваъда қилган шахс ушлангани ҳамда Тошкент вилоятида қарийб 160 гектар ер ноқонуний ўзлаштириб олингани ҳақида хабар берилганди.
Изоҳ (0)