Американинг Россиядаги элчихонаси 12 майдан бошлаб дипломатик визалардан ташқари барча ноиммиграцион визалар учун аризаларни кўриб чиқишни тўхтатади. Бу ҳақда элчихона веб-сайтига таяниб, Meduza хабар берди.
«Россия ҳукуматининг хатти-ҳаракатлари туфайли консуллик ходимларини 75 фоизга қисқартиришга мажбур бўлдик», — деди АҚШнинг Россиядаги элчихонаси.
Дипломатик ваколатхонанинг веб-сайтида эълон қилинган инглиз тилидаги хабарга кўра, элчихона ушбу вазиятда АҚШ фуқаролари учун хизматлар кўрсатишда, жумладан, паспортларни алмаштириш ва туғилганлик тўғрисидаги гувоҳномани беришда муаммолар бўлиши мумкинлиги ҳақида огоҳлантиради.
АҚШ элчихонаси, шунингдек, пандемия туфайли янгисини расмийлаштирмасдан, муддати ўтган виза билан Россияда қолишга рухсат берилган Америка фуқаролари 15 июнга қадар (янги қоидалар амал қилиш муддати) Россия Федерациясини тарк этиши ёки мамлакатда қонуний қолиш учун зарур бўлган ҳужжатларни расмийлаштириш билан ўзлари мустақил шуғулланиши кераклигини эслатиб ўтди.
Сўнгги вақтларда АҚШнинг Россиядаги элчихонаси иммиграцион ва ноиммиграцион визаларни фақат мурожаат этувчилар билан суҳбат талаб қилинмаган ҳолларда бераётган эди.
Россия 21 апрель куни Москвадаги АҚШ элчихонасининг ўн нафар ходимини persona non grata деб эълон қилди. Улар 21 майга қадар мамлакатни тарк этиши керак. АҚШ ҳам худди шу шартлар билан 10 нафар россиялик дипломатни мамлакатдан чиқариб юборди.
Бундан ташқари, Россия АҚШ дипломатик ваколатхоналарига маъмурий ва техник ходимларни Россия Федерацияси ва учинчи мамлакатлар фуқароларидан ёллашни тақиқлади. «Коммерсантъ»нинг ёзишича, АҚШнинг Россиядаги дипломатик ваколатхоналарида 450 киши ишлайди, уларнинг қанчаси россиялик экани номаълум, аммо гап ўнлаб ходимлар ҳақида кетмоқда. АҚШ хориждаги дипломатик ваколатхоналарининг деярли барча маъмурий ва техник ходимларини ўша мамлакатдан ёллайди. Аввалги сафар, Москва 1986 йилда худди шундай чекловларни жорий қилганда АҚШ элчиси ишга ўзи машина ҳайдаб боришига, унинг хотини эса зиёфатларда меҳмонларга ўзи хизмат қилишга мажбур бўлган.
Москва ва Вашингтон ўртасидаги муносабатларнинг кескинлашуви сўнгги марта 15 апрель куни, Америка президенти Жо Байден Россияга нисбатан янги санкциялар киритганидан кейин юз берди. Янги санкциялар Россиянинг АҚШдаги 2020 йилги президентлик сайловларига аралашиши, АҚШ ҳукумат идораларига қилинган киберҳужум ва Россиянинг Афғонистондаги америкаликларга қарши «Толибон» жангарилари билан тил бириктиргани билан боғлиқ. Оқ уй февраль ойида Россиянинг ушбу ҳаракатлари учун АҚШ расмийлари унга қарши санкциялар режалаштираётганини айтганди.
Изоҳ (0)