Чехияда 29 апрель куни бир неча минг киши мамлакат президенти Милош Земанга қарши намойиш уюштирди. Бу ҳақда Associated Press’га таяниб, «Интерфакс» хабар берди.
Хабарга кўра, намойишчилар Прага марказидаги Ватслав майдонига тўпланган. Улар ижтимоий масофани сақлаб, ниқоб тақиб олган эди.
Таъкидланишича, намойишчилар Земанни давлатга хиёнатда айбламоқда ва парламентдан президентга тегишли айбловлар қўйилишини талаб қилмоқда. Улар президентнинг 2014 йилда Врбетицадаги ўқ-дорилар омборидаги портлашда «Россия агентлари»нинг иштироки тўғрисида маълумот йўқлиги ҳақидаги баёнотидан кейин ушбу ҳаракатларни бошлади.
Чехиянинг бошқа шаҳарларида ҳам президентга қарши намойишлар бўлиб ўтди.
25 апрель куни Чехия президенти Милош Земан хавфсизлик бўйича ахборот хизматида (Чехия контрразведкаси) портлаш пайтида «рус агентлари» Врбетица қишлоғи ҳудудига ташриф буюргани тўғрисида ҳеч қандай далил йўқлигини айтди. «Келинг, жазавага тушмасдан мулоҳаза билан тергов натижаларини кутиб, шундан кейингина қарор қабул қилайлик», — деб таъкидлади у.
Земаннинг сўзларига кўра, агар Россия агентларининг Врбетицадаги портлашда иштироки тасдиқланса, Россия бунинг учун жавоб бериши керак бўлади, масалан, Чехия ҳукумати бир ҳафта олдин эълон қилганидек, «Росатом» компанияси Чехиядаги «Дуковани» АЭС учун тендерда қатнашмайди. Аксинча, агар шубҳалар рад этилса, демак, бу Чехия Республикасининг ички сиёсий ҳаёти учун жиддий оқибатларга олиб келиши мумкин бўлган махсус хизматларнинг ўйини бўлиб чиқади.
Россия—Чехия муносабатларининг кескинлашуви 17 апрель куни Чехия ҳукумати республика шарқидаги Врбетица қишлоғидаги ўқ-дорилар омборларида 2014 йилда содир бўлган портлашлар воқеасининг янги ҳолатларига аниқлик киритиш тўғрисида баёнот берганидан кейин бошланди. Чехия томонининг сўзларига кўра, ушбу воқеада Россия махсус хизматлари иштирок этган. The Insider ва Bellingcat агентликлари томонидан ўтказилган суриштирувга кўра, портлашлар операциясига Россия разведка бошқармасининг 29155-сонли ҳарбий қисм бошлиғи, генерал Андрей Аверянов шахсан раҳбарлик қилган. 17 апрель куни Прага Россия элчихонасининг 18 нафар ходимини чиқариб юборишни эълон қилди. Шунингдек, Чехия Сенати ҳукуматни Россия билан дўстлик шартномасини бекор қилишга ва Прагада фақат бир нафар россиялик дипломатни қолдиришга чақирди. Аввалроқ Депутатлар палатаси (Чехия парламентининг қуйи палатаси) ҳам Чехия ҳукуматини шундай чоралар кўришга чақирган эди.
Россия айбловларни бемаъни ва асоссиз деб атади ва Чехиянинг хатти-ҳаракатларига жавоб сифатида 20 нафар чехиялик дипломатни мамлакатдан чиқариб юборди.
Изоҳ (0)