«Насаф» ва «Бунёдкор» дуранг ўйнаб, Ўзбекистон Кубоги 1/8 финалига йўл олди, «Локомотив» ва «Сўғдиёна»дан йирик ғалабалар

Футбол бўйича Ўзбекистон Кубогининг 3-туридан ўрин олган бир қатор ўйинлар 28 апрель, чоршанба куни бўлиб ўтди.

«Насаф» ўз майдонида «Бунёдкор»ни қабул қилиб, 1:1 ҳисобидаги дурангга имзо чекди. Дастлаб 4-дақиқада Ҳусниддин Алиқулов мезбонларни ҳисобда олдинга олиб чиққан бўлса, 46-дақиқада Миржаҳон Мираҳмадов мувозанатни тиклади. Шу тариқа жамоалар E гуруҳи якунларига кўра кейинги босқич йўлланмасига эга чиқди.

Мазкур гуруҳнинг иккинчи ўйинида «Сўғдиёна» Биринчи Лига вакили «Рубин»ни йирик ҳисобда енгди. Жиззахликларнинг голларига Шоҳруз Норхонов (дубль), Шаҳбоз Жўрабеков, Арслонмурод Аманов муаллифлик қилган бўлса, «Рубин» таркибида Ҳусан Йўлдошев ўз ҳисобига гол ёздириб қўйди. «Сўғдиёна» ҳам 1/8 финалда ўйнайди.

А гуруҳидан ўрин олган ўйинда «Локомотив» «Арал Самали» майдонига сафар қилди ва 5:1 ҳисобидаги ғалабани тантана қилди. «Темир йўлчилар» сафида Жалолиддин Жумабоев, Азиз Омонов (дубль), Игорь Чикризов ва Иброҳим Ғанихонов, мезбонлардан эса Дамир Низанов ўз ҳисобига гол ёздириб қўйди.

«Турон» «Андижон» билан баҳс юритди ва кичик ҳисобда ғалабага эришди. Учрашувдаги ягона гол Жасур Ҳакимов томонидан 15-дақиқада урилди. Шу тариқа А гуруҳидан «Турон» ва «Локомотив» мусобақанинг 1/8 финал босқичига йўл олди.