Самарқанд шаҳридаги барча мактаб ва боғчаларда 27 апрелдан бошлаб онлайн таълим бериш тизими йўлга қўйилади. Бу ҳақда шаҳар ҳокимлиги матбуот хизмати хабар берди.
Маълум қилинишича, Самарқанд шаҳридаги мактабгача таълим муассасалари ҳамда умумий ўрта таълим мактабларида коронавирус инфекциясини юқтириб олиш кўрсаткичи кейинги кунларда бир неча баробар ошиб бораётгани боис шаҳар ҳокимлиги ҳузуридаги Эпидемияга қарши кураш фавқулодда комиссиясининг қарори тасдиқланган. Унга кўра, шаҳардаги барча мактаб ва мактабгача таълим муассасаларида 14 кунлик карантин жорий этилади.
Шу сабабли ўқувчиларга 27 апрелдан бошлаб онлайн таълим бериш тизими йўлга қўйилади.
«Муассасаларга кириб-чиқувчилар орасида карантин даврида коронавирусни юқтириб олиш ҳолатлари кузатилмаса таълим бериш тизими анъанавий йўлга қўйилади», — дейилади хабарда.
Аввалроқ Бухоро вилоятидаги 11 та мактаб ўқитувчи ва ўқувчиларда коронавирус аниқлангани сабаб карантинга ёпилди, шунингдек, Тошкент вилоятидаги 14 та мактаб, Самарқанддаги 35 та мактабнинг ўқитувчи ва ўқувчиларида коронавирус аниқлангани сабабли мактаблардаги ўқув жараёни онлайн шаклга ўтказилганди.
Изоҳ (0)