Тошкентдаги «Чуқурсой техник идора» темир йўл чегара божхона постида поезд вагонларининг ғилдираклари орасига психотроп дори воситалари яширилгани аниқланди. Бу ҳақда Давлат божхона қўмитаси матбуот хизмати маълум қилди.
Тошкент шаҳар божхона бошқармаси «Чуқурсой техник идора» темир йўл чегара божхона пости ходимлари томонидан Давлат хавфсизлик хизмати Чегара қўшинлари билан ҳамкорликда божхона постига хориждан кириб келган темир йўл вагонлари ўрнатилган тартибда божхона назоратидан ўтказилган.
Назорат давомида поезд таркибидаги вагон ғилдираги орқа таг қисмига яширилган 2 та қора рангли полиэтилен пакет божхона ходимларининг диққатини тортган.
Мазкур полиэтилен пакетлар кўздан кечирилганда, уларнинг ичида 8000 дона «Трамадол Ланнахер» (50 мг) номли дори воситаси борлиги аниқланган.
Мазкур ҳолат юзасидан божхона органлари томонидан терговга қадар текширув ҳаракатлари олиб борилмоқда.
Аввалроқ Андижонда гиёҳванд моддаларни оёқ кийимга яшириб ўтмоқчи бўлганлар қўлга тушгани, Фарғонада уйида гиёҳванд модда сақлаб келган шахсга нисбатан жиноят иши қўзғатилгани, Бектемир постида 36 ёшли Қирғизистон фуқаросининг ёнидан 8,34 гр кўкнори бошоғи топилгани тўғрисида хабар берилганди.
Изоҳ (0)