Наманган вилоятининг Косонсой туманидаги плантацияда Голландия лолаларининг 18 хили парваришланмоқда. Бу ҳақда «Дарё» мухбири Азизбек Абдувалиев хабар бермоқда.
Плантация учун Косонсойнинг «Туятўйди» массиви танлангани бежиз эмас. Бу ҳудуднинг тоғлар ва сув омборига яқинлиги хориж лолаларини ўстириш учун мақбул деб топилди.
«Яширмайман, дастлаб бу таклифга қарши бўлдим. Пахта-ғалладан бўлагини билмасдим-да. Ҳозир бўлса хурсандман, яхши ҳам ўшанда оёқ тираб туриб олмаганим, дейман. Чунки қариялар дуо қилишяпти, қўшни вилоятлар, ҳатто Самарқанд ва Жиззахдан ҳам лолазорни кўргани келишяпти», — дейди Косонсой туманидаги «Туятўйди келажаги» фермер хўжалиги раҳбари Зоҳиджон Баҳромов.
Фермернинг айтишича, Наманган гулчиликни ривожлантириш маркази ва голландиялик мутахассислар кўмагида ташкил этилган плантация учун 600 миллион сўмга яқин маблағ сарфланган. Бу йил харажатларни қоплаб, фойдага чиқишни кўзлаб турибди. Маҳсулотларини асосан гулчилар, гўзаллик салонлари ва гул дўконлари эгалари харид қилмоқда.
Маҳаллий ва хорижий лола ўртасидаги фарқ ҳақидаги саволга эса шундай жавоб берди:
«Маҳаллий тоғ лолалари булар каби катта очилмайди ва кўп турмайди, 10—15 кунда тўкилиб кетади. Голландия лолалари эса бир-икки ой туради, узилган ҳолда ҳам камида 20—25 кун сақлаш мумкин. Ўзига яраша меҳнати ҳам бор. Экиш, ўтоқ, дорисини вақтида бериш керак. Лекин совуққа чидамли. Ўтган йили роса қийғос гуллаган пайти, 9 апрелда устига 5 сантиметр қор ёғган. Тамом, совуқ уриб кетди, деб ўйлагандик. Йўқ, таъсир қилмаган. Иссиқни, жазирамани ёқтирмайди», — дейди фермер.
Зоҳиджон Баҳромовнинг айтишича, фермер лола плантацияси учун ажратилган майдонни икки баравар кўпайтириб, 10 гектарга етказмоқчи. Бунга қўшимча яна бир иссиқхона ҳам қуради. Экспортни йўлга қўйиш ниятида, ҳозирнинг ўзида келгуси йил ҳосили учун Тожикистон ва Қирғизистондан буюртмалар бор.
«Келгусида ўзимда етиштирилган гуллардан атир ва совунлар ишлаб чиқаришни йўлга қўймоқчиман. Бунинг учун хориждан дастгоҳлар олиб келамиз. Пиёзини қанд касалига даво дейишади, ўзимиздаги фармацевтика корхоналари билан ҳамкорликни йўлга қўймоқчиман. Лола мойининг бир литри нархи 20 минг долларга боради деб эшитганим бор, буни ҳам ўрганамиз. Хуллас, лола бизнесига энди жиддий киришамиз», — дейди Баҳромов.
Плантациядан қайтаётганимизда бўлажак келин-куёвларга кўзимиз тушди. Маҳаллий ёшлар учун лолазор фонида фотосессия уюштириш одатий ҳолга айланибди.
Изоҳ (0)