Бухорода янги туғилган чақалоқни 8 млн сўмга сотмоқчи бўлган она ва бола ушланди
Бухоролик аёл янги туғилган чақалоғини онаси билан биргаликда сотмоқчи бўлди, дея хабар бермоқда ЎзА вилоят Ички ишлар бошқармасига таяниб.
Қайд этилишича, Бухоро вилояти Терроризм ва экстремизмга қарши курашиш бошқармаси ҳамда Ғиждувон тумани Ички ишлар органлари фаолиятини мувофиқлаштириш бошқармаси ходимлари ҳамкорлигида тезкор тадбир ўтказилган.
Унда Пешку тумани «Валфажир» маҳалласида яшовчи фуқаро Ж.Ф. (аёл) яқинда дунёга келган фарзандини сотиш мақсадида ўз онаси билан жиноятни содир этиш учун олдиндан тил бириктиради.
Натижада она ва қиз бир гуруҳ бўлиб, тиббиёт муассасаси ҳудудида чақалоқни ўзга бир фуқарога 8 миллион сўмга баҳолаб сотаётган вақтида қўлга тушади ва бу иш тегишли тартибда расмийлаштирилади.
Мазкур ҳолат юзасидан туман Ички ишлар органлари фаолиятини мувофиқлаштириш бошқармаси ҳузуридаги тергов бўлими томонидан она ва қизга нисбатан Жиноят кодексининг 135-модда 2-қисми «э» банди (бир гуруҳ шахслар томонидан олдиндан тил бириктириб, содир қилинган одам савдоси) билан жиноят иши қўзғатилиб, дастлабки тергов ҳаракатлари олиб борилмоқда.
Бундан аввал Тошкент халқаро аэропортида фуқарони хорижга фоҳишалик қилиш учун жўнатаётган 20 ёшли қиз ва унинг шериги ушлангани, Тошкентда 8 ойлик ўғлини 10 минг долларга сотишга уринган аёл қўлга олингани ҳамда Туркияда яшовчи шахсга 22 ёшли қизни сотиб юборган тошкентлик аёлга нисбатан жиноий иш қўзғатилгани ҳақида хабар берилганди.
