Buxoro viloyatidagi 11 ta maktab o‘qituvchi va o‘quvchilarda koronavirus aniqlangani sabab karantinga yopildi

Buxoro viloyatidagi 11 ta maktabda darslar 14 kunga onlayn shaklga o‘tkazildi. Bu haqda viloyat hokimining ta’lim va tarbiya masalalari bo‘yicha maslahatchisi, Xalq ta’limi boshqarmasi boshlig‘i Dilfuza Mustafoyevaga tayanib O‘zA ma’lum qildi.

Qayd etilishicha, viloyatda xalq ta’limi tizimi xodimlarining 6 nafarida, maktab o‘quvchilarining esa 26 nafarida kasallik alomatlari aniqlangan.

“Kasallik tarqalishining oldini olish va o‘quvchilar xavfsizligini ta’minlash maqsadida hozirda ular faoliyat yuritayotgan va tahsil olayotgan 11 ta umumta’lim maktabida an’anaviy tarzdagi faoliyat to‘xtatildi. Maktablar ikki haftalik onlayn rejimga o‘tkazildi. Ammo vahimaga aslo o‘rin yo‘q. Kasallik aniqlangan xodim va o‘quvchilar esa zaruriy muolajalarni olmoqda”, — degan Dilfuza Mustafoyeva.

Uning ta’kidlashicha, ayni paytda kasallik yuqishi va tarqalishining oldini olish, o‘quvchilar va tizim xodimlarining xavfsizligini ta’minlash maqsadida viloyat Xalq ta’limi boshqarmasi tomonidan aniq chora-tadbirlar asosida ish olib borilmoqda.

Viloyatdagi ta’lim muassasalariga 76 tonna antiseptik, viloyat hokimligi tomonidan 50 ming dona, mahalliy budjet hisobidan 29 772 dona tibbiy niqob, 3566 dona dozator va 1173 dona pirometr yetkazib berilgan.

Avvalroq Buxoro shahridagi 3-o‘rta umumta’lim maktabi o‘quvchisida COVID-19 infeksiyasi qayd etilgani sababli o‘quv tizimi onlayn rejimga o‘tkazilgani haqida xabar berilgan edi.

Shuningdek, Toshkent viloyatidagi 14 ta maktab karantinga yopilgani, Samarqanddagi 35 ta maktabning o‘qituvchi va o‘quvchilarida koronavirus aniqlani sababli maktablardagi o‘quv jarayoni onlayn shaklga o‘tkazilgani ma’lum qilgandi.