25 апрель куни Тахиатош ИЭСдаги носозлик сабаб Қорақалпоғистоннинг айрим ҳудудларида электр таъминоти узилгани тўғрисида хабарлар тарқалган эди. «Иссиқлик электр станциялари»нинг маълум қилишича, иссиқлик электр станциясида ёнғин ва шу каби фавқулодда ҳолатлар юз бермаган.
«Айрим ижтимоий тармоқларда Тахиатош ИЭСда ёнғин юз бергани ва бунинг натижасида Қорақалпоғистон Республикасининг аксарият ҳудудларида электр энергияси узилиши юз бергани ҳақида турли хабарлар тарқалмоқда. ‘Иссиқлик электр станциялари’ расман шуни маълум қиладики, Тахиатош ИЭСда ҳеч қандай ёнғин ва шу каби фавқулодда ҳолатлар юз бермаган. Буни Фавқулодда вазиятлар вазирлиги ҳам тасдиқлаган», — дейилади хабарда.
Маълум қилинишича, 25 апрель куни соат 20:46 да станциядаги очиқ тақсимловчи қурилмада қисқа туташув юз бергани сабабли 1-сонли буғ-газ қурилмаси ва 1, 3-сонли турбогенераторлар автоматик ҳимоя тизимининг ишга тушиши натижасида ўчиб қолган.
Воқеа натижасида энергоускуналарга ҳеч қандай талафот етмаган. Соат 21:23 да станцияда очиқ тақсимловчи қурилманинг иш фаолияти тикланган. Таъкидланишича, энергоблоклар босқичма-босқич ишга туширилиб энерготизимга уланмоқда.
Мавзуга доир:
Изоҳ (0)