Samarqand shahridagi barcha maktab va bog‘chalar 27-apreldan boshlab onlayn tizimga o‘tadi

Samarqand shahridagi barcha maktab va bog‘chalarda 27-apreldan boshlab onlayn ta’lim berish tizimi yo‘lga qo‘yiladi. Bu haqda shahar hokimligi matbuot xizmati xabar berdi.

Ma’lum qilinishicha, Samarqand shahridagi maktabgacha ta’lim muassasalari hamda umumiy o‘rta ta’lim maktablarida koronavirus infeksiyasini yuqtirib olish ko‘rsatkichi keyingi kunlarda bir necha barobar oshib borayotgani bois shahar hokimligi huzuridagi Epidemiyaga qarshi kurash favqulodda komissiyasining qarori tasdiqlangan. Unga ko‘ra, shahardagi barcha maktab va maktabgacha ta’lim muassasalarida 14 kunlik karantin joriy etiladi.

Shu sababli o‘quvchilarga 27-apreldan boshlab onlayn ta’lim berish tizimi yo‘lga qo‘yiladi.

“Muassasalarga kirib-chiquvchilar orasida karantin davrida koronavirusni yuqtirib olish holatlari kuzatilmasa ta’lim berish tizimi an’anaviy yo‘lga qo‘yiladi”, — deyiladi xabarda.

Avvalroq Buxoro viloyatidagi 11 ta maktab o‘qituvchi va o‘quvchilarda koronavirus aniqlangani sabab karantinga yopildi, shuningdek, Toshkent viloyatidagi 14 ta maktab, Samarqanddagi 35 ta maktabning o‘qituvchi va o‘quvchilarida koronavirus aniqlangani sababli maktablardagi o‘quv jarayoni onlayn shaklga o‘tkazilgandi.