Индонезиянинг Бали ороли қирғоқлари яқинида 838 метр чуқурликда, беш кун олдин ғойиб бўлган KRI Nanggala-402 сувости кемасининг қолдиқлари топилди. Бу ҳақда Индонезия армияси ва денгиз флоти вакилларига таяниб, The Jakarta Post хабар берди.
Индонезия Қуролли кучлари бош қўмондони, ҳаво маршали Хади Тчахжантонинг маълум қилишича, камералар билан жиҳозланган сув ости роботи океан тубида деярли 60 метрлик сувости кемасини топди. У камида уч қисмга бўлиниб кетган: кеманинг корпуси, қуйруқ қисми ва барча асосий элементлари ажралиб кетган. Асосий қисм парчаланиб кетган.
Қўмондон тўпланган далиллар билан сувости кемасининг чўкиб кетгани ҳамда бортдаги барча ҳарбий хизматчиларнинг ҳалок бўлгани ҳақидаги хулосани инкор этиб бўлмаслигини таъкидлади. «Қутқарувчилар, шунингдек, экипажнинг 53 аъзосидан бири қочишга уринганидан дарак берувчи қутқарув кийимини топди», — дея қўшимча қилди у.
Таъкидланишича, фожиа юзасидан суриштирув давом этмоқда, аммо расмийлар ҳодисада инсон омилини истисно қилмоқда, чунки кема сувга туширилишидан олдин «экипаж томонидан барча керакли процедуралар амалга оширилган». Индонезия ҳарбийлари кемани Бали денгизи тубидан олиб чиқмоқчи, аммо уларда бундай тажриба йўқ, дея тан олди Тчахжанто.
KRI Nanggala-402 сувости кемаси 21 апрелда Бали ороли яқинидаги торпедоларни чиқариш бўйича ҳарбий ўқув машғулотлари вақтида йўқолган. Кема бортида 53 нафар одам бўлган. Кейинчалик АҚШ Индонезиянинг ғойиб бўлган сувости кемасини қидириш учун авиация юбориши, бедарак йўқолган сувости кемасида кислород тамом бўлгани ҳақида хабарлар берилган. Содир бўлган воқеанинг келиб чиқиш сабаблари юзасидан расмий тахминлар билдирилмаган.
Кейинроқ Индонезия Ҳарбий денгиз кучлари сувости кемасидаги буюмлар топилгани, 53 нафар экипаж аъзосининг ҳаммаси ҳалок бўлганини маълум қилди. 24 апрель куни Индонезия Ҳарбий денгиз кучлари штаби бошлиғи сувости кемасининг бўлаклари, тахминан, 850 метр чуқурликдан топилгани ҳақида хабар берди. Кема 500 метргача чуқурликка тушиш учун мўлжалланган эди. 25 апрель куни Индонезия президенти Жоко Видодо расман KRI Nanggala-402 сувости кемасини Бали денгизида ҳалокатга учраган деб эълон қилди ва экипаж аъзоларининг оилаларига ҳамдардлик билдирди.
KRI Nanggala-402 1981 йилда Германияда қурилган, 2011 йилда эса модернизация қилинган эди. Бу Индонезия Ҳарбий денгиз кучлари арсеналидаги бешта шундай кемадан биридир.
Изоҳ (0)