Ingenuity вертолёти Марсда учинчи парвозини амалга ошириб, 50 метр масофани босиб ўтди

Ingenuity вертолётининг учинчи парвози 25 апрель куни амалга оширилди ҳамда тезлик ва масофа бўйича ҳар қачонгидан, ҳатто Ерда олиб борилган синовлар чоғида намойиш этилган натижалардан ҳам кўра, яхшироқ кўрсаткичларга эришилди, деб ёзади «Интерфакс» NASA сайтига таяниб.

https://youtu.be/ka7S42EXPq0

Вертолёт иккинчи парвоздаги каби 16 фут (5 метр)га кўтарилди, сўнг 50 метр масофани учиб ўтиб (футбол майдони узунлигининг ярмидан кўпроғига тенг масофа), сониясига 6,6 фут (2 метр) максимал тезликка эришди.

«Бугунги парвоз биз режалаштиргандек ўтди, аммо барибир бу ҳайратланарли эди», — деди Вашингтондаги NASA бош қароргоҳида Ingenuity Mars Helicopter лойиҳаси раҳбари Дейв Лавери.

Шунингдек, NASA ушбу вертолёт томонидан олинган Марснинг рангли суратини эълон қилди. Унда Қизил сайёранинг юзасини ҳамда Езеро кратерида Perseverance марсоходи қолдирган изларни кўриш мумкин.

«Бу учар қурилма томонидан парвоз чоғида олинган биринчи рангли тасвир», — деди NASA вакили.

Сурат 22 апрель куни олинган. Ўша куни Ingenuity дрони иккинчи марта муваффақиятли автоном парвозни амалга оширган эди. Ўшанда вертолёт беш метргача баландликка кўтарилди. Сайёра юзаси узра бироз муаллақ тургач, вертолёт 5 даражага оғди ва ён томонга қараб 2 метр масофага учди. Шундан сўнг у яна муаллақ турди, сўнг турли томонларга бурилиб, ўзининг рангли камераларини ишга солди. Сўнгра у қўниш учун ўз «аэродроми»га йўл олди. Бутун парвоз, тахминан, 50 сония давом этди.

Биринчи марта амалга оширилган 19 апрель кунги муваффақиятли синов парвози чоғида вертолёт 3 метр баландликка кўтарилган ва Марс юзаси узра 39 сония вақт ўтказган эди.

Ingenuity 31 кун ишлашга мўлжалланган. У яна камида иккита парвозни амалга ошириб, марсоход атрофидаги ҳудудни аэрофотосъёмка қилиши керак.

Дроннинг диаметри 1,2 метр, оғирлиги тахминан 1,8 кг бўлиб, уни ишлаб чиқиш учун 85 миллион доллар сарфланган. У иккита камера билан жиҳозланган ва суратга олиш учун ҳавода 20-30 сония давомида муаллақ тура олади. NASA аввалроқ бундай қурилма учун асосий муаммо Марс атмосферасининг ўта сийраклигидан иборат бўлишини маълум қилганди. «Марс атмосферасининг зичлиги Ерникининг атиги 1 фоизига тенг, шу сабабли вертолёт шунчаки сайёра юзасида турган вақтида ҳам бу унинг учун Ердаги 30 км баландликка тенг бўлади», — деган эди лойиҳа муаллифи.

Ingenuity Марсга Perseverance марсоходи билан бирга етиб келган. Марсоход ортилган ракета 2020 йил июлида Флорида штатида жойлашган Канаверал бурнидаги космодромдан учирилган эди. Февралда Америка ровери Езеро кратерига бориб қўнди. Бунгача сунъий йўлдошдан олинган маълумотлар ёрдамида у ерда катта кўлга бориб қуйилган дарё ўзани излари аниқланган эди. Олимлар фикрича, кратерда ҳаёт излари сақланиб қолган бўлиши мумкин.