Ироқ бош вазири Мустафо ал-Козимий Бағдод губернатори Жабир ал-Ата ва мамлакат соғлиқни сақлаш вазири Ҳасан ат-Тамимийни лавозимларидан озод этди, деб ёзади «Коммерсантъ». Бунга коронавирус билан касалланганлар даволанаётган шифохонада юз бериб, 88 кишининг ўлимига олиб келган ёнғин сабаб бўлди.
Ал-Козимийнинг фикрича, «касалхонадаги даҳшатли ёнғинга масъулиятсизлик ва хўжасизлик асосий сабаблар бўлган». Ишдан бўшатилганларга нисбатан тергов олиб борилмоқда. Касалхона бош шифокори, хавфсизлик хизмати бошлиғи ва бинонинг техник таъминоти учун масъул шахслар қўлга олинган.
Эслатиб ўтамиз, ёнғин 24 апрель, шанба куни кечқурун содир бўлганди. Касалхонада ёнғиндан ҳимоя тизими бўлмаган. Дастлабки маълумотларга кўра, ёнғин бошланишига кислород баллонининг портлаши сабаб бўлган. Сўнгги маълумотлар бўйича 88 киши ҳалок бўлди, 100 дан ортиғи жароҳат олди. Қурбонларнинг камида 28 нафари сунъий нафас олдириш аппаратларига уланган беморлар бўлган.
Баъзи беморлар ёнғиндан қочиш учун деразалардан сакраган. Икки қаватли бино деярли тўлиқ ёниб битган.
Ёнғиндан кейин баъзи сиёсатчилар, жамоат арбоблари ва парламент аъзолари Ироқ соғлиқни сақлаш вазири Ҳасан ал-Тамимийнинг истеъфосини талаб қилди.
Ироқда уч кунлик мотам эълон қилинди.
Мавзуга доир:
- Бағдоддаги COVID-касалхонада ёнғин юз берди, 80 дан ортиқ одам ҳалок бўлди. Ироқда уч кунлик мотам эълон қилинди (видео)
- Ҳиндистондаги COVID-19 касалхонасида 24 нафар одам газдан бўғилиб ҳалок бўлди (фото ва видео)
- Японияда яна карантин эълон қилинди, Ҳиндистонда COVID-касалхона ёниб кетди, Венгрияда ресторан ва театрлар фақат эмланганлар учун очилади. Коронахабарлар
Изоҳ (0)