Crew Dragon астронавтлари Халқаро космик станцияга етиб борди. Энди станциядагилар 11 киши бўлди (видео)

24 апрель куни Халқаро космик станцияга (ХКС) туташган Американинг SpaceX компаниясига тегишли Crew Dragon-2 кўпмарталик кемасининг астронавтлари станциянинг бортига ўтди. Бу ҳақда NASAга таяниб, «Интерфакс» хабар берди.

Уларнинг келиши билан станция экипажи аъзоларининг сони 11 нафарга етди.

Станциянинг Америка сегментидаги Harmony модулига туташиш АҚШнинг Шарқий соҳили вақти билан 05:08 да (Тошкент вақти билан 14:08) автоматик равишда амалга оширилди. Тахминан икки соатдан кейин кема ва станция ўртасида люклар очилди.

Crew Dragon-2 кемасида бир вақтнинг ўзида учта агентликнинг вакиллари — NASA астронавтлари Меган Макартур ва Шейн Кимбро, Европа космик агентлиги (ECA) астронавти Томас Песке ва Япония Аэрокосмик тадқиқотлар агентлиги (JAXA) астронавти Акихико Хосиде келди.

"Endeavour arriving!" Welcome to the @Space_Station, Crew-2!

Their arrival means there are now 11 humans aboard our orbiting laboratory, a number not seen since the space shuttle era. Hugs abound. pic.twitter.com/uSwW3JFl6K

— NASA (@NASA) April 24, 2021

Улар ХКСга 2021 йилнинг 9 апрель куни «Союз МС-18» кемасида келган «Роскосмос» космонавтлари Олег Новицкий ва Пётр Дубров ҳамда NASA астронавти Марк Ванде Хай, шунингдек, станцияга 2020 йилнинг 17 ноябрь куни Crew Dragon-1 кемасида келган астронавтлар Майкл Ҳопкинс, Виктор Гловер, Шеннон Уокер (станция командири) ва JAXA астронавти Соити Ногутидан иборат экипажга келиб қўшилди.

28 апрель куни Crew Dragon-1 кемаси тўрт нафар астронавт билан Ерга қайтгач, ХКС бортида етти киши қолади.

Маълумот учун, «Роскосмос» Россия космик станциясининг биринчи модулини қуришни бошлади ва 2025 йилдан Халқаро космик станция (ХКС) лойиҳасидан чиқиб кетишни режалаштирмоқда.

Шунингдек, Boeing компаниясига тегишли CСТ-100 Starliner космик кемасининг май ойига режалаштирилган Халқаро космик станцияга (ХКС) иккинчи учувчисиз синов парвози июль ойининг охирига қолдирилди.

Starliner’нинг 2019 йил 20 декабрда амалга оширилган биринчи синов парвозидан сўнг (ўшанда космик кема ХКСга туташа олмаган эди), уни учувчисиз режимда ХКСга қайта учириш тўғрисида қарор қабул қилинди.