24-aprel kuni Xalqaro kosmik stansiyaga (XKS) tutashgan Amerikaning SpaceX kompaniyasiga tegishli Crew Dragon-2 ko‘pmartalik kemasining astronavtlari stansiyaning bortiga o‘tdi. Bu haqda NASAga tayanib, “Interfaks” xabar berdi.
Ularning kelishi bilan stansiya ekipaji a’zolarining soni 11 nafarga yetdi.
Stansiyaning Amerika segmentidagi Harmony moduliga tutashish AQShning Sharqiy sohili vaqti bilan 05:08 da (Toshkent vaqti bilan 14:08) avtomatik ravishda amalga oshirildi. Taxminan ikki soatdan keyin kema va stansiya o‘rtasida lyuklar ochildi.
Crew Dragon-2 kemasida bir vaqtning o‘zida uchta agentlikning vakillari — NASA astronavtlari Megan Makartur va Sheyn Kimbro, Yevropa kosmik agentligi (ESA) astronavti Tomas Peske va Yaponiya Aerokosmik tadqiqotlar agentligi (JAXA) astronavti Akixiko Xoside keldi.
"Endeavour arriving!" Welcome to the @Space_Station, Crew-2!
— NASA (@NASA) April 24, 2021
Their arrival means there are now 11 humans aboard our orbiting laboratory, a number not seen since the space shuttle era. Hugs abound. pic.twitter.com/uSwW3JFl6K
Ular XKSga 2021-yilning 9-aprel kuni “Soyuz MS-18” kemasida kelgan “Roskosmos” kosmonavtlari Oleg Novitskiy va Pyotr Dubrov hamda NASA astronavti Mark Vande Xay, shuningdek, stansiyaga 2020-yilning 17-noyabr kuni Crew Dragon-1 kemasida kelgan astronavtlar Maykl Hopkins, Viktor Glover, Shennon Uoker (stansiya komandiri) va JAXA astronavti Soiti Nogutidan iborat ekipajga kelib qo‘shildi.
28-aprel kuni Crew Dragon-1 kemasi to‘rt nafar astronavt bilan Yerga qaytgach, XKS bortida yetti kishi qoladi.
Ma’lumot uchun, “Roskosmos” Rossiya kosmik stansiyasining birinchi modulini qurishni boshladi va 2025-yildan Xalqaro kosmik stansiya (XKS) loyihasidan chiqib ketishni rejalashtirmoqda.
Shuningdek, Boeing kompaniyasiga tegishli CST-100 Starliner kosmik kemasining may oyiga rejalashtirilgan Xalqaro kosmik stansiyaga (XKS) ikkinchi uchuvchisiz sinov parvozi iyul oyining oxiriga qoldirildi.
Starliner’ning 2019-yil 20-dekabrda amalga oshirilgan birinchi sinov parvozidan so‘ng (o‘shanda kosmik kema XKSga tutasha olmagan edi), uni uchuvchisiz rejimda XKSga qayta uchirish to‘g‘risida qaror qabul qilindi.
Izoh (0)