Тошкент вилоятининг Нурафшон шаҳрида хизмат вазифасини олиб бораётган ЙПХ инспекторининг ҳужжатларни тақдим этиш борасидаги қонуний талабини бажармаган Malibu ҳайдовчисига жазо тайинланди. Бу ҳақда вилоят ИИББ ЙҲХБ ахборот хизмати «Дарё»га маълум қилди.
Маълум қилинишича, Нурафшон шаҳрида хизмат олиб бораётган ЙПХ инспектори I. Абдужалилов Malibu автомобилига тўхташ ишорасини берган ва ҳайдовчидан ҳужжатларини тақдим этишни сўраган. Ҳайдовчи эса инспекторга қўполлик қилиб, ҳужжатларини тақдим этмаган. Воқеа жойига ёрдамчи кучлар чақирилиб, ҳайдовчи шаҳар ИИБга олиб борилган ва унга далолатнома расмийлаштирилган.
Ҳолат бўйича тўпланган ҳужжатлар жиноят ишлари бўйича Нурафшон судига юборилган. Суд улар билан батафсил танишиб, гувоҳларнинг кўрсатмалари, видеолавҳаларни ўрганиб, ҳайдовчига нисбатан беш сутка маъмурий қамоқ жазосини тайинлаган.
Шу каби ҳолат Ангрен шаҳрида ҳам кузатилган. ЙПХ инспекторлари ва Транспорт вазирлигининг вилоят бошқармаси ходимлари билан ҳамкорликда ўтказилган рейд тадбирлари давомида Damas ҳайдовчиси тўхташ ишорасига бўйсунмасдан қочиб кетган.
ЙПХ инспектори транспорт воситасининг ортидан кузатишга тушган, Damas ҳайдовчиси кейинги чорраҳада турган инспекторларнинг ҳам талабаги бўйсунмаган. Кузатув охиригача давом эттирилиб, автомобиль тўхтатилган.
Ҳайдовчи ЙПХ ходимларига фаол қаршилик кўрсатиб, уларни ҳақоратлаган, қонуний талабларига бўйсунмаган.
Кўрилган чоралар натижасида ҳайдовчи ички ишлар бўлимига олиб борилган. Унга нисбатан ҳужжатлар расмийлаштирилиб, ўрнатилган тартибда судга оширилган. Суд уларни ўрганиб чиқиб, ҳайдовчига нисбатан 10 сутка маъмурий қамоқ жазосини белгилаган.
Аввалроқ Жиззахда қоидани бузган ҳайдовчини сўккан ЙПХ ходимига нисбатан хизмат текшируви тайинлангани, Тошкентда ЙПХ инспекторини ҳақорат қилган Matiz ҳайдовчисига чора кўрилгани, Андижонда «тонировка»си учун тўхтатилган Nexia ҳайдовчиси ЙПХ инспектори билан жанжаллашгани тўғрисида хабар берилганди.
