Ўзбекистон журналистика ва оммавий коммуникациялар университетининг ётоқхонасида яшовчи талабада коронавирус аниқлангани сабабли университет ётоқхонаси карантинга олиниб, ўқиш жараёнлари 12 апрелдан бошлаб икки ҳафтага онлайн шаклга ўтказилганди. Университет матбуот хизматининг хабар беришича, ЎзЖОКУда масофавий таълим ўқув йили охиригача давом эттирилади.
«Ҳозирги вазиятдан келиб чиққан ҳолда бакалавриат, сиртқи таълим шаклида таҳсил оладиган барча талабалар, қолаверса, магистратурада таҳсил олаётган 1-курс талабалари (2-курс, магистратурани тамомлаётган талабалардан ташқари) ўқишни онлайн давом эттиришга келишилди. Биласиз, ҳозирда аниқланган ‘африкача штамм’ оддий COVID-19’дан кўра анча хавфли ҳисобланади. Шуни инобатга олган ҳолда, сизнинг саломатлигингиз биз учун ҳамма нарсадан устун ва муҳимроқ», — дейилади хабарда.
Аввалроқ Тошкент давлат шарқшунослик университетида дарслар 22 апрелдан онлайн шаклга ўтказилгани ҳақида хабар берилган эди. Бундан аввал Жисмоний тарбия ва спорт университети ва Жаҳон тиллари университети ҳамда унинг академик лицейи ҳам ўқув жараёнлари онлайн шаклга ўтказилгани ҳақида хабар берилган эди. Жаҳон иқтисодиёти ва дипломатия университети 19 апрелдан, Самарқанд иқтисодиёт ва сервис институтида эса 20 апрелдан 14 кунга масофавий шаклга ўтказилганди.
Ўзбекистонда коронавирусга чалингани расман тан олинганлар сони 88 280 нафарга етди. Соғлиқни сақлаш вазирлиги маълумотларига кўра, 22 апрель куни мамлакатнинг 14 та ҳудудида жами 345 та касалланиш ҳолати аниқланган. Бош вазир Абдулла Арипов бошчилигида коронавирусга қарши кураш комиссиясининг кенгайтирилган йиғилишида Ўзбекистонга коронавируснинг «африкача» штамми кириб келгани маълум қилинганди.
Изоҳ (0)