Тошкент шаҳар ИИББ Жиноят қидирув бошқармаси коррупция ва иқтисодий жиноятларга қарши кураш бўлими ходимлари 30 грамм радиоактив материал сотмоқчи бўлган фуқароларни қўлга олди, деб хабар бермоқда бошқарма матбуот хизмати.
Режалаштирилаётган ноқонуний келишув ҳақида маълумот Тошкент шаҳар ИИББ тезкор вакилларига 17 апрелда келиб тушган. Шу куннинг ўзида жиноят қидирув ходимлари Алоҳида вазифаларни бажарувчи мобил отрядни жалб қилган ҳолда жиноятчиларни қўлга олиш бўйича тадбир ўтказган. Натижада уч киши 30 грамм радиоактив материал эвазига 9 минг доллар олаётганида қўлга олинган.
Қўлга олинганлардан бири — муқаддам судланган Андижон вилоятилик 33 ёшли О.А., унинг шериклари — 30 ёшли А.Н. ва 27 ёшли А.Т. илгари жиноят содир этгани маълум бўлмаса-да, айнан улар харидор излаб юрган.
Мазкур факт асосида Тошкент шаҳар ИИББ Тергов бошқармаси томонидан Жиноят кодексининг 252-моддаси 2-қисми (радиоактив материалларни қонунга хилоф равишда эгаллаш) бўйича жиноий иш қўзғатилган.
«Тергов фуқаролар мазкур материалларни қаердан олганликларини аниқлашда давом этмоқда», — дейилади хабарда.
Изоҳ (0)