Вазирлар Маҳкамасининг 2020 йил 12 августдаги тегишли фармойишига асосан, Ўзбекистонда коронавирус ҳамда бошқа касалликларга қарши самарали кураш, аниқ ташхис ва улар устида юқори технологик илмий тадқиқотларни амалга ошириш учун Соғлиқни сақлаш вазирлиги Республика патологик анатомия марказига Япониянинг нуфузли JEOL компанияси томонидан ишлаб чиқарилган JEM-2100Plus русумдаги замонавий трансмиссион электрон микроскоп олиб келинди. Бу ҳақда Соғлиқни сақлаш вазирлиги хабар қилди.
Республика патологик анатомия маркази Ўзбекистондаги патологоанатомик хизматнинг бош муассасаси бўлиб, барча вилоятлар ва йирик шаҳарлардаги даволаш-профилактика муассасаларида даволанаётган касалликларни биопция усулида морфологик жиҳатдан аниқлаш ва касалликдан вафот этганлар мурдасини аутопция усулида текшириб, бевосита ўлим сабабини аниқлаш, клиник диагнозни таҳлил қилиш, ҳар қандай хатоликни аниқлаш каби ташхислаш тадбирларини амалга оширади.
Таъкидланишича, врач-патологоанатомларнинг асосий иш қуроли ёруғлик микроскопи ва электрон микроскоп ҳисобланади. Японияда ишлаб чиқарилган JEM-2100Plus русумдаги замонавий трансмиссион электрон микроскоп Инновацион ривожлантириш ва новаторлик ғояларини қўллаб-қувватлаш жамғармасидан ажратилган маблағлар ҳисобидан молиялаштирилди.
Ушбу трансмиссион электрон микроскоп 1 нанометрли тузилмани миллион марта катталаштириб, 1 миллиметр даражада кўрсатади. Масалан: 100 нанометрли коронавирусни миллион марта катталаштириб, 10 см қилиб кўрсатади.
Ҳозирда JEM-2100Plus русумдаги замонавий трансмиссион электрон микроскопдан тўлиқ фойдаланиш ва илмий тадқиқот ишларини бажариш йўлга қўйилди.
15 апрелдан бошлаб Ўзбекистондаги барча тиббиёт олий ўқув юртлари ва илмий-амалий марказлар билан шартномалар тузилиб, тадқиқотлар бошлаб юборилди. 1 майдан бошлаб текширишга қабул қилинган биологик материалга махсус тартибда ишлов бериш, электрон микроскопда кўриб ўрганиш, электроннограммалар олиш, уларни илмий жиҳатдан тавсифлаб, эгасига қайтариш йўлга қўйилади.
Бундан аввал Ўзбекистонда қайси касалликлардан ўлим ҳолати кузатилмаётгани ҳақида маълумот берилгани, Ўзбекистонда коронавирусга қарши эмланганлар сони 450 минг кишидан ошгани ҳамда ўзбек—хитой вакцинаси COVID-19’нинг қайси штаммларига қарши самарали экани маълум қилингани ҳақида хабар берилганди.
Изоҳ (0)