Ғиждувонда ён қўшниси газ қувурига яширинча уланиб, табиий газдан ноқонуний фойдаланиш ҳолати аниқланди

Бухоро вилояти Ғиждувон туманида газ қувурига ноқонуний равишда уланиб олган корхона аниқланди, дея хабар бермоқда Бош прокуратура ҳузуридаги Департамент матбуот хизмати.

Қайд этилишича, Департаментнинг Ғиждувон туман бўлими томонидан ўтказилган терговга қадар текширувда «С.И.» МЧЖ томонидан жамиятга қарашли бўлган оҳак ишлаб чиқариш цехи газ қувури ён қўшниси бўлган «Х.Ф.» МЧЖга қарашли иссиқхонанинг газ қувурига яширинча уланганлиги, шунингдек, ўз навбатида «Х.Ф.» МЧЖ томонидан ҳам табиий газдан ноқонуний фойдаланганлиги натижасида «Ҳудудгаз Бухоро» филиали манфаатларига жами 125 миллион сўм зарар етказилганлиги аниқланган.

Мазкур ҳолат юзасидан Жиноят кодексининг 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят иши қўзғатилиб, тергов ҳаракатлари ўтказилмоқда.

Бундан аввал «Данғаратумангаз» бўлими собиқ раҳбари газ ўғирлаган оҳак ишлаб чиқариш цехларидан 642 миллион сўм зарарни ундирмагани аниқлангани, Жиззахдаги кучли гумбурлаш овози газ қувурининг ёрилиши оқибатида юзага келгани маълум қилингани ҳамда Самарқандда газга ноқонуний уланиб, давлатга 360 миллион сўм зарар етказган фуқароларга жиноий иш қўзғатилгани ҳақида хабар берилганди.