Vazirlar Mahkamasining 2020-yil 12-avgustdagi tegishli farmoyishiga asosan, O‘zbekistonda koronavirus hamda boshqa kasalliklarga qarshi samarali kurash, aniq tashxis va ular ustida yuqori texnologik ilmiy tadqiqotlarni amalga oshirish uchun Sog‘liqni saqlash vazirligi Respublika patologik anatomiya markaziga Yaponiyaning nufuzli JEOL kompaniyasi tomonidan ishlab chiqarilgan JEM-2100Plus rusumdagi zamonaviy transmission elektron mikroskop olib kelindi. Bu haqda Sog‘liqni saqlash vazirligi xabar qildi.
Respublika patologik anatomiya markazi O‘zbekistondagi patologoanatomik xizmatning bosh muassasasi bo‘lib, barcha viloyatlar va yirik shaharlardagi davolash-profilaktika muassasalarida davolanayotgan kasalliklarni biopsiya usulida morfologik jihatdan aniqlash va kasallikdan vafot etganlar murdasini autopsiya usulida tekshirib, bevosita o‘lim sababini aniqlash, klinik diagnozni tahlil qilish, har qanday xatolikni aniqlash kabi tashxislash tadbirlarini amalga oshiradi.
Ta’kidlanishicha, vrach-patologoanatomlarning asosiy ish quroli yorug‘lik mikroskopi va elektron mikroskop hisoblanadi. Yaponiyada ishlab chiqarilgan JEM-2100Plus rusumdagi zamonaviy transmission elektron mikroskop Innovatsion rivojlantirish va novatorlik g‘oyalarini qo‘llab-quvvatlash jamg‘armasidan ajratilgan mablag‘lar hisobidan moliyalashtirildi.
Ushbu transmission elektron mikroskop 1 nanometrli tuzilmani million marta kattalashtirib, 1 millimetr darajada ko‘rsatadi. Masalan: 100 nanometrli koronavirusni million marta kattalashtirib, 10 sm qilib ko‘rsatadi.
Hozirda JEM-2100Plus rusumdagi zamonaviy transmission elektron mikroskopdan to‘liq foydalanish va ilmiy tadqiqot ishlarini bajarish yo‘lga qo‘yildi.
15-apreldan boshlab O‘zbekistondagi barcha tibbiyot oliy o‘quv yurtlari va ilmiy-amaliy markazlar bilan shartnomalar tuzilib, tadqiqotlar boshlab yuborildi. 1-maydan boshlab tekshirishga qabul qilingan biologik materialga maxsus tartibda ishlov berish, elektron mikroskopda ko‘rib o‘rganish, elektronnogrammalar olish, ularni ilmiy jihatdan tavsiflab, egasiga qaytarish yo‘lga qo‘yiladi.
Bundan avval O‘zbekistonda qaysi kasalliklardan o‘lim holati kuzatilmayotgani haqida ma’lumot berilgani, O‘zbekistonda koronavirusga qarshi emlanganlar soni 450 ming kishidan oshgani hamda o‘zbek—xitoy vaksinasi COVID-19’ning qaysi shtammlariga qarshi samarali ekani ma’lum qilingani haqida xabar berilgandi.
Izoh (0)