Исроилда охирги иккита коронавирусдан даволаниш бўлимлари ҳам ёпилди. Бу ҳақда Ynet News хабар берди.
Мамлакатда коронавирусга чалинганлар даволанувчи бўлимлар бир неча ҳафта олдин ёпила бошлаган эди. Хадера шаҳридаги Хиллел Яффе ва Тверия шаҳридаги Барух Паде тиббиёт марказлари мамлакатда коронавирусга чалинганларни даволаётган охирги иккита тиббиёт бўлими эди.
Эндиликда иккала бўлим ҳам бутунлай ёпилди, беморлар эса даволаниш учун стационар бўлимларга ўтказилди.
Аввалроқ Исроилдаги эпидемиологик вазиятнинг яхшиланиши муносабати билан кўчаларда тиббий ниқоб тақиш мажбурияти бекор қилинганди. Лекин мамлакат Соғлиқни сақлаш вазирлиги одам гавжум бўлган шароитда ниқоб тақишни тавсия қилади. Бино ичида эса ниқоб тақиш мажбурий бўлиб қолмоқда.
Маълумот учун, Исроил аҳолини коронавирусга қарши эмлаш тезлиги бўйича дунёда етакчи бўлиб қолмоқда. «2021 йил марти охирига келиб, 16 ёшдан катта бўлган исроилликларнинг барчаси Pfizer/BioNTech вакцинаси билан эмлана олади», — дея мамлакат бош вазири Бинямин Нетаньяху февраль бошида эълон қилган эди.
Мавзуга доир:
- Чеченистонда ҳам ниқоб тақмай юришга рухсат берилди ва республика ҳудудига кириш очиб қўйилди
- Россия Олий суди ниқоб режимини бекор қилишни рад этди. Даъвогарларнинг бир қисми ниқоб тақмагани учун судга киритилмади
- АҚШнинг Техас ва Миссисипи штатлари ниқоб тақиш мажбуриятини бекор қилди ва тадбиркорлар учун чекловларни олиб ташлади
- Удмуртия Россия ҳудудлари ичида биринчи бўлиб ниқоб тақиш мажбуриятини бекор қилди
Изоҳ (0)