Франция Миллий мажлиси ҳукуматнинг таклифига биноан қисқа масофаларга амалга ошириладиган ички авиақатновларни тақиқлаш учун овоз берди, деб ёзмоқда Le Figaro. Ушбу қарор мамлакатнинг карбонат ангидрид чиқиндиларини камайтириш бўйича умумий стратегиясининг бир қисми сифатида қабул қилинди.
Энди бу тақиқни Франция Сенати маъқуллаши керак. Агар шундай бўлса, Миллий мажлисда қарорни узил-кесил тасдиқловчи якуний овоз бериш бўлиб ўтади. Reuters’нинг маълум қилишича, қуйи палатанинг кўпчилик вакили «Олға, Франция» президент тарафдорлари партиясининг аъзоси ва унинг иттифоқчилари бўлгани учун ушбу қарорнинг тасдиқланиш эҳтимоли юқори. Лекин Сенатда мухолифатчилар кўпчиликни ташкил этади, деб ёзмоқда Deutsche Welle.
Агар ҳужжат ҳар икки палата тасдиқловининг барча босқичларидан ўтса, авиакомпаниялар биридан иккинчисига поездда икки ярим соатдан камроқ вақтда бориш мумкин бўлган Франция шаҳарлари орасидаги маҳаллий парвозларни амалга ошира олмайди. Натижада авиакомпанияларнинг Париж, Нант, Лион ёки Бордо ўртасидаги парвозлари бекор қилинади.
Авиакомпаниялар қонун лойиҳасини танқид қилиб, коронавирус пандемияси сабабли саноат инқирози пайтидаги ноўрин қарор деб атади: ҳатто янги тақиқлар жорий қилинмаган тақдирда ҳам, авиақатновлар бозори 2024 йилга келибгина 2019 йилдаги ҳолатига қайтиши кутилаётган эди.
Парламентда овоз берилишидан атиги уч кун олдин ҳукумат бундан аввалроқ рекорд йўқотишларни қайд этган Air France миллий авиакомпаниясига 4 миллиард евролик ёрдам пакети ажратилишини маъқуллади. Бу ҳукуматнинг Air France’га иккинчи ёрдами — 2020 йилда компания 7 миллиард евро миқдорида молиявий кўмак олган эди.
Шунингдек, қисқа йўналишлардаги парвозларга тақиқ қўйиш учун овоз бериш аслида шу пайтгача мавжуд бўлган вазиятни юзага чиқаради, чунки 2020 йилнинг май ойида Air France молиявий ёрдам эвазига ушбу йўналишлардан воз кечишга мажбур бўлган эди, деб ёзмоқда RFI. Энди бу чора рақобатчи авиакомпанияларнинг ҳам ушбу йўналишларда парвоз қилишини тақиқлайди.
Мамлакат президенти Эммануэль Макрон ташаббуси билан 2019 йилда иқлим ўзгаришига қарши курашиш ғояларини муҳокама қилиш учун тузилган маслаҳат гуруҳи — Франция Фуқаролик конвенти (баъзи мамлакатларда сайлаб қўйиладиган алоҳида давлат органи) томонидан қисқа масофадаги парвозларни тақиқлаш низоми таклиф қилинди.
Макрон конвентга 2030 йилгача карбонат ангидрид ажралмаларини 1990 йилга нисбатан 40 фоизга камайтириш чораларини ишлаб чиқишни топширди. Конвентнинг бошқа таклифлари қаторида йўлтанламас автомобилларининг рекламасини тақиқлаш, электромобиллар учун кредитлар жорий қилиш, азотли ўғитлар учун солиқларни ошириш чоралари ҳам кўзда тутилган.
Конвент аввалига биридан иккинчисига поездда тўрт соатда бориш мумкин бўлган шаҳарлар орасидаги парвозларни тақиқлаш таклифини берди, лекин парламент муҳокамасида бу талаб юмшатилди.
Франция иссиқхона газларини камайтириш учун авиақатновларни чеклашга ҳаракат қилаётган Европадаги биринчи давлат эмас. 2020 йилда Австрия ҳукумати 350 километрдан камроқ масофага авиапарвозлар чипталарига 30 евродан солиқ солган эди, шунингдек, Вена—Зальцбург йўналишидаги парвозларни бекор қилиш эвазига Austrian Airlines миллий авиакомпаниясига субсидиялар тақдим этди. 2019 йил Нидерландия парламенти Амстердам ва Бельгия пойтахти Брюссель ўртасидаги парвозларни бекор қилишни маъқуллаб овоз берди, лекин бу низом Европа Иттифоқининг мамлакатлари ўртасида эркин ҳаракатланиш тўғрисидаги қонунчилигига зид бўлгани учун амалиётга татбиқ этилмади.
Изоҳ (0)