Fransiya Milliy majlisi hukumatning taklifiga binoan qisqa masofalarga amalga oshiriladigan ichki aviaqatnovlarni taqiqlash uchun ovoz berdi, deb yozmoqda Le Figaro. Ushbu qaror mamlakatning karbonat angidrid chiqindilarini kamaytirish bo‘yicha umumiy strategiyasining bir qismi sifatida qabul qilindi.
Endi bu taqiqni Fransiya Senati ma’qullashi kerak. Agar shunday bo‘lsa, Milliy majlisda qarorni uzil-kesil tasdiqlovchi yakuniy ovoz berish bo‘lib o‘tadi. Reuters’ning ma’lum qilishicha, quyi palataning ko‘pchilik vakili “Olg‘a, Fransiya” prezident tarafdorlari partiyasining a’zosi va uning ittifoqchilari bo‘lgani uchun ushbu qarorning tasdiqlanish ehtimoli yuqori. Lekin Senatda muxolifatchilar ko‘pchilikni tashkil etadi, deb yozmoqda Deutsche Welle.
Agar hujjat har ikki palata tasdiqlovining barcha bosqichlaridan o‘tsa, aviakompaniyalar biridan ikkinchisiga poyezdda ikki yarim soatdan kamroq vaqtda borish mumkin bo‘lgan Fransiya shaharlari orasidagi mahalliy parvozlarni amalga oshira olmaydi. Natijada aviakompaniyalarning Parij, Nant, Lion yoki Bordo o‘rtasidagi parvozlari bekor qilinadi.
Aviakompaniyalar qonun loyihasini tanqid qilib, koronavirus pandemiyasi sababli sanoat inqirozi paytidagi noo‘rin qaror deb atadi: hatto yangi taqiqlar joriy qilinmagan taqdirda ham, aviaqatnovlar bozori 2024-yilga kelibgina 2019-yildagi holatiga qaytishi kutilayotgan edi.
Parlamentda ovoz berilishidan atigi uch kun oldin hukumat bundan avvalroq rekord yo‘qotishlarni qayd etgan Air France milliy aviakompaniyasiga 4 milliard yevrolik yordam paketi ajratilishini ma’qulladi. Bu hukumatning Air France’ga ikkinchi yordami — 2020-yilda kompaniya 7 milliard yevro miqdorida moliyaviy ko‘mak olgan edi.
Shuningdek, qisqa yo‘nalishlardagi parvozlarga taqiq qo‘yish uchun ovoz berish aslida shu paytgacha mavjud bo‘lgan vaziyatni yuzaga chiqaradi, chunki 2020-yilning may oyida Air France moliyaviy yordam evaziga ushbu yo‘nalishlardan voz kechishga majbur bo‘lgan edi, deb yozmoqda RFI. Endi bu chora raqobatchi aviakompaniyalarning ham ushbu yo‘nalishlarda parvoz qilishini taqiqlaydi.
Mamlakat prezidenti Emmanuel Makron tashabbusi bilan 2019-yilda iqlim o‘zgarishiga qarshi kurashish g‘oyalarini muhokama qilish uchun tuzilgan maslahat guruhi — Fransiya Fuqarolik konventi (ba’zi mamlakatlarda saylab qo‘yiladigan alohida davlat organi) tomonidan qisqa masofadagi parvozlarni taqiqlash nizomi taklif qilindi.
Makron konventga 2030-yilgacha karbonat angidrid ajralmalarini 1990-yilga nisbatan 40 foizga kamaytirish choralarini ishlab chiqishni topshirdi. Konventning boshqa takliflari qatorida yo‘ltanlamas avtomobillarining reklamasini taqiqlash, elektromobillar uchun kreditlar joriy qilish, azotli o‘g‘itlar uchun soliqlarni oshirish choralari ham ko‘zda tutilgan.
Konvent avvaliga biridan ikkinchisiga poyezdda to‘rt soatda borish mumkin bo‘lgan shaharlar orasidagi parvozlarni taqiqlash taklifini berdi, lekin parlament muhokamasida bu talab yumshatildi.
Fransiya issiqxona gazlarini kamaytirish uchun aviaqatnovlarni cheklashga harakat qilayotgan Yevropadagi birinchi davlat emas. 2020-yilda Avstriya hukumati 350 kilometrdan kamroq masofaga aviaparvozlar chiptalariga 30 yevrodan soliq solgan edi, shuningdek, Vena—Zalsburg yo‘nalishidagi parvozlarni bekor qilish evaziga Austrian Airlines milliy aviakompaniyasiga subsidiyalar taqdim etdi. 2019-yil Niderlandiya parlamenti Amsterdam va Belgiya poytaxti Bryussel o‘rtasidagi parvozlarni bekor qilishni ma’qullab ovoz berdi, lekin bu nizom Yevropa Ittifoqining mamlakatlari o‘rtasida erkin harakatlanish to‘g‘risidagi qonunchiligiga zid bo‘lgani uchun amaliyotga tatbiq etilmadi.
Izoh (0)