Saudiya Arabistonida iqlim o‘zgarishiga qarshi kurash uchun 10 mlrd daraxt ekiladi

Saudiya Arabistoni valiahd shahzodasi Muhammad bin Salmon as-Saud kelgusi o‘n yilliklar ichida qirollik hududida o‘n milliard daraxt ekish to‘g‘risidagi dasturni ma’qulladi. Bu haqda “Korrespondent.net” xabar berdi.

Shu bilan birga, valiahd shahzoda “arab birodarlar ko‘magi bilan yashil Yaqin Sharq” dasturini boshlashni niyat qilmoqda, dastur mintaqa bo‘ylab 40 milliard daraxt ekishni nazarda tutadi.

“Dunyoning bosh neft qazib oluvchisi sifatida bizning qirolligimiz iqlim o‘zgarishi oqibatlarini yengish uchun o‘z zimmasidagi mas’uliyatni his qilgan holda yashil dunyo yaratish bo‘yicha ham global yetakchiga aylanishga intilmoqda”, — dedi Muhammad bin Salmon.

Uning so‘zlariga ko‘ra, mintaqa uchun eng katta ekologik muammo bu cho‘llanishdir. “Qum bo‘ronlaridan ko‘riladigan yillik zarar 13 milliard dollarni tashkil qiladi, shuningdek, havoning issiqxona gazlari bilan ifloslanishi Saudiya Arabistonidagi umr davomiyligining 1,5 yilga qisqarishiga olib keldi. “Shuning uchun bizning harakatlarimiz tabiiy o‘simliklarni ko‘paytirish, uglerod chiqindilarini kamaytirish, ifloslanish va yer degradatsiyasiga qarshi kurashishga qaratiladi ”, — dedi shahzoda.

Muhammad bin Salmonning ta’kidlashicha, Saudiya qirolligi “sayyorani himoya qiladigan yashil yo‘l xaritasini ishlab chiqishda” boshqa mamlakatlar bilan hamkorlik qiladi. U 2016-yilda qabul qilingan “Saudiya Arabistoni missiyasi: 2030” strategik dasturining amalga oshirilishi fuqarolarning hayot sifatini yaxshilashga imkon berishini ta’kidladi.

Eslatib o‘tamiz, shvetsiyalik olimlar 1 trillion daraxt ekilsa, global issiqlik to‘xtashini ma’lum qilgan edi.

Avvalroq Avstraliyada iqlim o‘zgarishiga qarshi kurashish uchun milliard dona daraxt ekilishi haqida xabar berilgandi. Taxminlarga ko‘ra, 2050-yilgacha davom etadigan mazkur loyiha 2030-yilgacha 18 million tonna issiqxona gazini yo‘qotishga yordam beradi.