Эрон уранни бойитиш даражасини 60 фоизга чиқарганини маълум қилди

Эрон уранни бойитиш даражасини 60 фоизга чиқаришга муваффақ бўлди. Бу ҳақда Эрон парламенти раиси Муҳаммад Бакир Галибафга таяниб «Интерфакс» хабар қилди.

«Эронлик олимлар ўтган тун ярмида уранни 60 фоизга бойитишга муваффақ бўлди», — деди парламент раиси. Галибафнинг аниқлик киритишича, бу маҳаллий вақт билан жума куни соат 00:40 да (Тошкент вақти билан 01:10) содир бўлган.

Эрон Атом энергияси ташкилоти раҳбари Али Акбар Солиҳ, ўз навбатида, «ҳозирда 60 фоизгача бойитилган соатига тўққиз грамм уран ишлаб чиқарилмоқда», деди.

Бир кун олдин Европа Иттифоқи дипломатияси раҳбарининг расмий вакили Петер Стано Эроннинг уранни 60 фоизгача бойитиш тўғрисидаги қарори Эрон ядро дастури бўйича Қўшма ҳаракат режаси қўшма комиссиясининг Венадаги кенгашига зид келишини айтган эди.

Илгари Буюк Британия, Германия ва Франция ҳукуматлари Эрон томонидан уранни 60 фоизга бойитишни бошлаш тўғрисидаги қарордан хавотирда экани ҳақида уч давлатнинг Ташқи ишлар вазирликлари расмий вакиллари маълум қилган эди.

Эроннинг ядро дастури бўйича Қўшма ҳаракатлар режаси иштирокчиси бўлган Европанинг мазкур уч давлати фикрига кўра, Эрондан келган ушбу хабар «Қўшма ҳаракат аъзолари ва АҚШнинг ядро дастурини қайта тиклаш бўйича тезроқ дипломатик ечимни топиш учун мазмунли муҳокамаларни бошлаган бир пайтда жуда ачинарли ҳолат».

Лондон, Берлин ва Париж Эроннинг сўнгги «хавфли хабарлари» ушбу музокараларнинг конструктив руҳи ва хайрихоҳлигига зид келади, деб ҳисобламоқда. Улар Эронни «дипломатик жараённи янада мураккаблаштирмасликка» чақирди.

Эрон 14 апрелдан бошлаб уранни 60 фоизгача бойитиш ишларини бошлаган эди. Эрон президенти Ҳасан Руҳоний Теҳроннинг бундай қарор қабул қилиши Исроилнинг Натанздаги ядро объектига уюштирган ҳужумига ўзига хос жавоб эканини айтган.

«Уранни 60 фоизгача бойитиш бу шафқатсизликка қарши жавобдир», — дея Руҳоний воқеадан зарар кўрган ИР-1 центрифугалари замонавий ва уранни анча тезроқ бойитадиган ривожланган ИР-6 центрифугалари билан алмаштирилишини таъкидлаган.

Бундан ташқари, Эрон яна минглаб сўнгги авлод центрифугаларини фойдаланишга топширишни режалаштирмоқда.

11 апрелда Натанздаги Аҳмад Рошан номли уранни бойитиш комплексида электр таъминотини тақсимлаш тизимида муаммолар кузатилган. Али Акбар Солиҳий тизимдаги носозлик «ядро террорчилиги» ҳаракати туфайли юзага келганини билдирган. Аммо у мазкур ҳаракатлар ортида қайси кучлар турганлиги борасида муайян фикр билдирмасликка қарор қилган.