Грузия пойтахти Тбилисидаги Грузия банки филиалларидан бирига қуролланган киши бостириб кирди ва одамларни гаровга олди. Бу ҳақда Грузиянинг «Рустави 2» телеканалига таяниб, Meduza хабар берди.
Айнан нечта одам гаровга олинганига аниқлик киритилмаган. «Рустави 2» маълумотларига кўра, бир-икки киши гаровга олинган.
Ҳодиса жойига ҳуқуқ-тартибот идоралари ходимлари етиб келди. Полиция банк филиали ёнида жойлашган «Авлабари» метро станциясини ёпди.
Сўнгги маълумотларга кўра, икки соатлик махсус операциядан сўнг полиция банкка ҳужум қилган жиноятчини ҳибсга олди. Гаровдагиларнинг барчаси қўйиб юборилди, уларнинг ҳеч бири жабрланмаган.
Бундан аввал 2020 йил октябрь ойида қуролли жиноятчи Зугдиди шаҳридаги Грузия банки филиалида 40 дан ортиқ одамни гаровга олган эди. Босқинчи 500 минг доллар талаб қилган. Сўралган пул унга топширилган, шундан сўнг у гаровдагиларнинг барчасини озод қилиб, ғойиб бўлган.
Аввалроқ АҚШнинг Индиана штатидаги FedEx логистика компанияси омборида отишма содир бўлгани ҳақида хабар берилганди. Полиция маълумотларига кўра, отишмада саккиз киши ҳалок бўлган. Яна тўрт киши жароҳатлар билан касалхоналарга етказилган, жабрланганлардан бирининг аҳволи оғир. Ҳодиса сабаблари ҳозирча номаълум.
Изоҳ (0)