Самарқанд вилоятида фуқаронинг телефон ва нақд пулларини тазйиқ ўтказиб олиб қўйган ва бу ҳолатни видеога олиб, TikTok’да тарқатиб юбориш билан қўрқитган шахслар учланди, дея хабар қилмоқда Тергов департаменти.
Қайд этилишича, 2021 йилнинг 8 апрель куни фуқаро 25 ёшли М.М. Самарқанд шаҳри бўйича ИИО ФМБга ариза билан мурожаат қилган.
Аризада қайд этилишича, 2021 йил 5 апрель куни 26 ёшли У.М. уни алдов йўли билан Самарқанд тумани «Бўзи» маҳалласи ҳудудидаги қаровсиз жойга олиб бориб, у ерда унга тазйиқ ўтказиб, нархи 2 200 000 сўмлик Samsung S 20А русумли, нархи 1 500 000 сўмлик телефон аппаратларини ҳамда 200 доллар ва 112 000 сўм пул маблағларини очиқдан-очиқ талон-торож қилган.
Ушбу ҳолатни 25 ёшли Б.Ш. видеотасвирга олиб, видеони TikTok ижтимоий тармоғига чиқариб, шарманда қилиш йўли билан қўрқитиб, икки дона телефон аппаратларини қайтариб олиши учун 5 000 000 сўм пул беришини талаб қилган.
Ариза келиб тушган куни Самарқанд шаҳри «Кафтархона» маҳалласи ҳудудида У.М. ва Б.Ш. М.М.дан товламачилик йўли билан 400 АҚШ доллари олаётган вақтларида ушланган.
Мазкур ҳолат юзасидан Самарқанд шаҳри бўйича ИИО ФМБ ҳузуридаги тергов бўлими томонидан У.М. ва Б.Ш.га нисбатан Жиноят кодексининг 165-моддаси 2-қисми «в» банди (бир гуруҳ шахслар томонидан олдиндан тил бириктириб, содир этилган товламачилик) билан жиноят иши қўзғатилган.
Тергов ҳаракатлари жараёнида жабрланувчи М.М. У.М. официант бўлиб ишлаган ресторанда овқатланиб, 1 000 000 сўм пулларни тўламасдан кетиб қолганлиги сабабли У.М. ишдан бўшатилгани қасдини олиш мақсадида ушбу жиноятни содир қилганлиги аниқланган.
Ҳозирда тергов давом этмоқда.
Бундан аввал Жиззахдаги ресторанда рақс тушаётган йигитлар қўллари бир-бирига тегиб кетиши сабабли жанжаллашиб кетгани, Бухорода уй-жой коммунал хизмат кўрсатиш бошқармаси бўлим бошлиғи 2,3 миллион сўм пора билан қўлга тушгани ҳамда Фарғонада икки нафар Тожикистон фуқаросидан танишининг қарзини беришни талаб қилиб, уларни ўлдириш билан қўрқитган шахслар ушлангани ҳақида хабар берилганди.
Изоҳ (0)