Фарғона ҳамда Сурхондарё вилоятлари ҳокимларига янги маслаҳатчилар тайинланди. Бу ҳақда «Дарё» мухбири хабар берди.
Юсуфжон Камолов Фарғона вилояти ҳокимининг жамоатчилик билан ишлаш бўйича маслаҳатчиси лавозимига тайинланди.
Маълум бўлишича, Юсуфжон Камолов тайинловга қадар Фарғона вилояти Архив иши ҳудудий бошқармаси бошлиғи вазифасида ишлаган. Шунингдек, у Ўзбекистон тумани ҳокимлигида, вилоят Иқтисодиёт бош бошқармасида, вилоят ҳокимлигида турли масъул лавозимларда меҳнат қилган. 2014—2019 йилларда Фарғона вилояти давлат архиви бошлиғи, 2019 йилда Тошкент шаҳар давлат архиви бошлиғи вазифасида фаолият юритган.
Шунингдек, Сурхондарё вилояти ҳокимининг 2021 йил 6 апрелдаги қарори билан Фахриддин Менглиев Тўра Боболовнинг жамоатчилик билан ишлаш бўйича маслаҳатчиси этиб тайинланди.
Таъкидланишича, Фахриддин Менглиев 1982 йил Сурхондарё вилоятининг Шўрчи туманида туғилган бўлиб, 2006 йил Ички ишлар академиясини, 2013 йили академиянинг Олий академик курсини тамомлаган. Мутахассислиги бўйича ҳуқуқшунос.
Тайинловга қадар у вилоят ИИБ бошлиғи ўринбосари, бир вақтнинг ўзида вилоят маҳалла ва оилани қўллаб-қувватлаш бошқармаси бошлиғи ўринбосари лавозимларида фаолият юритиб келган.
Фахриддин Менглиев турли йиллар давомида вилоят ИИБ тизимида масъул лавозимларда — Тергов бошқармаси бошлиғининг биринчи ўринбосари, ташкилий-инспекторлик бўлими, ташкилий-инспекторлик ва ахборот-таҳлил бўлими, ташкилий бошқарма, шунингдек, Музработ тумани ички ишлар бўлими бошлиғи вазифаларида ишлаган.
Изоҳ (0)