Samarqand viloyatida fuqaroning telefon va naqd pullarini tazyiq o‘tkazib olib qo‘ygan va bu holatni videoga olib, TikTok’da tarqatib yuborish bilan qo‘rqitgan shaxslar uchlandi, deya xabar qilmoqda Tergov departamenti.
Qayd etilishicha, 2021-yilning 8-aprel kuni fuqaro 25 yoshli M.M. Samarqand shahri bo‘yicha IIO FMBga ariza bilan murojaat qilgan.
Arizada qayd etilishicha, 2021-yil 5-aprel kuni 26 yoshli U.M. uni aldov yo‘li bilan Samarqand tumani “Bo‘zi” mahallasi hududidagi qarovsiz joyga olib borib, u yerda unga tazyiq o‘tkazib, narxi 2 200 000 so‘mlik Samsung S 20A rusumli, narxi 1 500 000 so‘mlik telefon apparatlarini hamda 200 dollar va 112 000 so‘m pul mablag‘larini ochiqdan ochiq talon-toroj qilgan.
Ushbu holatni 25 yoshli B.Sh. videotasvirga olib, videoni TikTok ijtimoiy tarmog‘iga chiqarib, sharmanda qilish yo‘li bilan qo‘rqitib, ikki dona telefon apparatlarini qaytarib olishi uchun 5 000 000 so‘m pul berishini talab qilgan.
Ariza kelib tushgan kuni Samarqand shahri “Kaftarxona” mahallasi hududida U.M. va B.Sh. M.M.dan tovlamachilik yo‘li bilan 400 AQSh dollari olayotgan vaqtlarida ushlangan.
Mazkur holat yuzasidan Samarqand shahri bo‘yicha IIO FMB huzuridagi tergov bo‘limi tomonidan U.M. va B.Sh.ga nisbatan Jinoyat kodeksining 165-moddasi 2-qismi “v” bandi (bir guruh shaxslar tomonidan oldindan til biriktirib, sodir etilgan tovlamachilik) bilan jinoyat ishi qo‘zg‘atilgan.
Tergov harakatlari jarayonida jabrlanuvchi M.M. U.M. ofitsiant bo‘lib ishlagan restoranda ovqatlanib, 1 000 000 so‘m pullarni to‘lamasdan ketib qolganligi sababli U.M. ishdan bo‘shatilgani qasdini olish maqsadida ushbu jinoyatni sodir qilganligi aniqlangan.
Hozirda tergov davom etmoqda.
Bundan avval Jizzaxdagi restoranda raqs tushayotgan yigitlar qo‘llari bir-biriga tegib ketishi sababli janjallashib ketgani, Buxoroda uy-joy kommunal xizmat ko‘rsatish boshqarmasi bo‘lim boshlig‘i 2,3 million so‘m pora bilan qo‘lga tushgani hamda Farg‘onada ikki nafar Tojikiston fuqarosidan tanishining qarzini berishni talab qilib, ularni o‘ldirish bilan qo‘rqitgan shaxslar ushlangani haqida xabar berilgandi.
Izoh (0)