Kongoda Ebola kasalligiga qarshi emlash kampaniyasi rasman boshlandi, deb xabar berdi Jahon sog‘liqni saqlash tashkiloti (JSST)ning Afrika mintaqaviy byurosi rasmiy Twitter sahifasida.
Foto: Twitter / JSST
“Ebolaga qarshi emlash kampaniyasi Kongo Demokratik Respublikasining Butembo shahrida, virus qayta paydo bo‘lganidan bir hafta o‘tgach, rasman boshlandi. Vaksinani Ebola kasalligidan ilk bemor davolanib chiqqan Matanda shifoxonasining tibbiyot xodimlari qabul qildi”, — deyiladi xabarda.
🇨🇩:#Ebola vaccination campaign officially launched in #Butembo #DRC — just one week after the resurgence of the virus. Health workers at Matanda health centre, where the first Ebola patient was treated, were the first to be vaccinated. pic.twitter.com/tNucuLpkrC
— WHO African Region (@WHOAFRO) February 15, 2021
Bundan avval JSST Gvineyada Ebola bezgagi epidemiyasi boshlanganini e’lon qilgandi. JSST mutaxassislari allaqachon Gvineya bilan chegaradosh mamlakatlar hukumatlari bilan birgalikda kasallik tarqalishining oldini olish uchun tayyorgarlik ko‘rmoqda. Ma’lum qilinishicha, Gvineyada 2016-yildan beri ilk marta Ebola virusidan to‘rtta o‘lim holati qayd etilgan.
Ma’lumot uchun, Ebola virusi odam va hayvonlarga ta’sir qiluvchi o‘tkir infeksiyani keltirib chiqaradi. Kasallik birinchi marta 1976-yilda aniqlangan. Ushbu virusli kasallik 2013—2016-yillarda G‘arbiy Afrikada juda keng tarqalib ketdi. Gvineyada boshlangan kasallik Liberiya va Syerra-Leonega ham o‘tib ketdi. Kasallikning o‘ziga xos xavfli jihati unda kasallanganlar orasida o‘lim holatining yuqoriligidadir. O‘sha paytda 11 315 kishi yoki kasallarning 50 foizi vafot etgan. 2019-yilning iyul oyida Kongoda qayd etilganidan keyin JSST xalqaro favqulodda holat e’lon qilgan. Mamlakatda kasallik paydo bo‘lganidan buyon 2200 kishi vafot etgan.
