Эрон Натанздаги фавқулодда ҳолатдан кейин уранни 60 фоизгача бойитиш ишларига киришди

Эрон 14 апрелдан бошлаб уранни 60 фоизгача бойитиш ишларини бошлади. Бу ҳақда мамлакат ташқи ишлар вазирининг ўринбосари Аббос Ароқчининг сўзларига таяниб, Эрон ва ғарб ОАВ хабар тарқатган, деб ёзмоқда «Интерфакс».

«Эрон уранни 60 фоизгача бойитиш ишларини бошлаши ҳақида МАГАТЭни огоҳлантирган», – дейилади Press TV эълон қилган Эрон ТИВ баёнотида.

Тахминларга кўра Теҳроннинг бундай қарор қабул қилиши Исроилнинг Натанздаги ядро объектига ҳужум уюштирганига ўзига хос жавоб бўлиши мумкин.

Бундан ташқари Эрон Натанздаги объектга яна минг дона махсус қурилма етказиб беришни режалаштирган.

Натанздаги ҳодиса12 апрель куни Эрон ташқи ишлари вазири Жавод Зариф Исроилнинг Натанздаги ядро объектига уюштирилган ҳужум учун масъулиятни ўз зиммасига олганини маълум қилди ва Теҳрон бу ҳаракат учун жавоб қайтаришини билдирди. Кейинчалик Зариф ҳали содир бўлган ҳодиса учун якуний хулосалар олинмаганини айтиб, қайта огоҳлантириш берган.

Эрон ОАВ мамлакат разведка вазирлигидаги манбаларга таяниб, Теҳроннинг Натанздаги объектга уюштирилган ҳужум ортида турган шахснинг кимлиги аниқлангани ва айни вақтда уни қўлга тушириш борасидаги чора-тадбирлар амалга оширилаётганини хабар қилган.

The New York Times газетаси АҚШ разведкасидаги манбага асосланиб, Натанздаги объектда содир бўлган ҳодиса у ерда уранни бойитиш ишларини камида 9 ойга тўхтатиб қўйгани ҳақида хабар берган. Нашр суҳбатлашган манбаларнинг айтишича, кучли портлаш Натанздаги энергия таъминоти тизимини ишдан чиқарган. Тизим ишламаса уранни бойитиш ускунлари фаол бўлмайди. Бироқ Эрон атом энергияси ташкилотининг раҳбари Али Акбар Солиҳий Натанзда содир бўлган воқеа уранни бойитиш жараёнига таъсир кўрсатмаганини айтган.

11 апрелда Натанздаги Аҳмад Рошан номли уранни бойитиш комплексида электр таъминотини тақсимлаш тизимида муаммолар кузатилган. Али Акбар Солиҳий тизимдаги носозлик «ядро террорчилиги» ҳаракати туфайли юзага келганини билдирган. Аммо у мазкур ҳаракатлар ортида қайси кучлар турганлиги борасида муайян фикр билдирмасликка қарор қилган.

Jerusalem Post газетаси мазкур ҳодисага Исроил разведкаси «Моссад»нинг киберҳужум уюштирганлиги сабаб бўлиши мумкинлигини тахмин қилган.