Франция ҳукумати Бразилияда коронавируснинг «бразилияча» штамми кенг тарқалаётгани сабабли ушбу мамлакат билан парвозларни номаълум муддатга тўхтатишга қарор қилди. Бу ҳақда Франция бош вазири Жан Кастекс ўзининг Миллий мажлисдаги чиқишида маълум қилди, деб ёзмоқда «РБК».

Фото: EPA

«Биз вазият ёмонлашаётганини маълум қиламиз. Шунинг учун Бразилия ва Франция ўртасидаги барча парвозларни кейинги ўзгаришларга қадар тўхтатиб туришга қарор қилдик», — деб бош вазирдан иқтибос келтирди France Bleu нашри.

Январь ойида Франция коронавируснинг «жанубий африкача» штаммининг кенг тарқалиши муносабати билан мамлакатга кириш тартибини кучайтиргани ҳақида хабар берди. Европа Иттифоқининг фуқаролари бўлмаган ташриф буюрувчилар коронавирус тестининг манфий натижаларини тақдим этиши ва бир ҳафталик мажбурий карантинга олиниши белгилаб қўйилди.

2020 йил декабрь ойининг охирига келиб Бразилияда коронавируснинг янги штамми аниқланди. 2021 йилнинг январь ойида Италия барча Лотин Америкаси мамлакатлари билан авиақатновларни бекор қилди. Шунингдек, Италия Соғлиқни сақлаш вазирлиги охирги 14 кун ичида Бразилияда бўлганлар учун Италияга киришни тақиқлади, мамлакатга аввалроқ кириб келганлар учун эса коронавирусга қарши мажбурий тест топшириш белгиланди.

Аввалроқ Россиянинг коронавирусга қарши кураш бўйича тезкор штаби Туркия ва Танзанияга авиақатновларни тўхтатгани маълум бўлди. 15 апрелдан 1 июнгача давом этадиган тақиқ чартер ва доимий рейсларга тегишли бўлиб, истисно тариқасида ҳафтасига иккита рейсга рухсат бериш режалаштирилган.

Шунингдек, Россия билан бир қаторда Хитой ва бошқа мамлакатлар ҳам Туркия билан парвозларни тўхтатишга қарор қилди.

Маълумот учун, Туркия коронавирус пандемиясининг энг қийин даврлардан бирини бошдан кечирмоқда.  Мамлакатнинг барча ҳудудларида касалланиш ўсиб бораётгани таъкидланди. Ҳукумат маълумотларига кўра, аҳолининг 80 фоизи инфекцияни юқтириш хавфи юқори бўлган шаҳарларда яшайди.