Бишкекда норозилик намойиши уюштирилиб, маҳаллий кенгашларга сайлов натижаларини бекор қилиш талаб қилинди

Қирғизистонда 11 апрель, якшанба куни Конституциянинг янги таҳрири бўйича референдум билан бир вақтда ўтказилган маҳаллий кенгашларга сайловлар натижаларини бекор қилиш талаби билан мамлакат Марказий сайлов комиссияси биноси ёнида 100 га яқин одам тўпланди, деб ёзади «Интерфакс».

Акция иштирокчилари сайлов якунларига кўра Бишкек шаҳар кенгашига кирмаган «Реформа», «Бутун Қирғизистон», Социал-демократлар, Қирғизистон социалистик партияси, Қирғизистон коммунистлар партияси, «Улутман», «Тинчлик» партиялари номидан чиқди. Улар сайловчиларни ўз томонига оғдириб олиш ва маъмурий ресурсдан фойдаланиш билан боғлиқ оммавий қонун бузилишлари туфайли маҳаллий кенгашларга сайловлар натижаларини бекор қилишни талаб қилмоқда.

Овоз беришнинг дастлабки якунлари эълон қилинганидан кейин «Реформа» партияси сайлов натижаларини тан олмаслигини маълум қилди.

«7 фоизли маррадан ўтган деярли барча партиялар сайловчиларни пора орқали оғдириб олиш, фуқароларга босим ўтказиш учун уй қўмиталари ва бошқа ҳокимият органларидан фойдалангани қайд этилган. Кузатувчилар сайлов кампанияси чоғида ҳам, овоз бериш куни ҳам кўплаб қонун бузилиш ҳолатларини аниқлади. Шунга қарамай, Марказий сайлов комиссияси бу партияларнинг ҳеч бирини четлатмади», — дейилади баёнотда.

Бишкек ҳудудий сайлов комиссияси партиялар, кузатувчилар ва жамоат фондларидан келиб тушган шикоятлар асосида 8 та сайлов участкасидаги бинодан ташқарида берилган овозлар натижаларини бекор қилди.

МДҲнинг кузатувчилар миссияси эса референдум халқаро талабларга мос равишда ўтказилганини маълум қилди. Референдум куни кузатувчилар Бишкек ҳамда Чуй вилоятидаги 78 та участкани бориб кўрган.

Эслатиб ўтамиз, 11 апрель куни Қирғизистонда конституцияга ўзгартиришлар киритиш тўғрисидаги референдум ва маҳаллий органларга сайловлар бўлиб ўтди.

МСК дастлабки маълумотларига кўра, референдумда сайловчиларнинг 37,33 фоизи қатнашди, участкаларга 1 миллион 346 минг фуқаро борди. Сайловчиларнинг якуний рўйхатига жами 3 миллион 606 минг киши кирган.

97,66 фоиз овозлар ҳисоблаб чиқилганидан кейин маълум бўлишича, сайловчиларнинг 79,24 фоизи ёки 1 миллион 66 минг киши Конституциянинг янги таҳририни ёқлаб овоз берган.

Референдум билан бир вақтда 28 та шаҳар ва 420 та қишлоқ округларида маҳаллий кенгашларга сайловлар бўлиб ўтди. Дастлабки маълумотлар бўйича «Ата Журт Қирғизистон» партияси маҳаллий кенгашлар депутатлари сайловида энг кўп овоз тўплаган. Экспертлар фикрича, партия ҳукуматпарастдир.