Абдулла Арипов Қозоғистон бош вазири Асқар Мамин билан учрашди

Ўзбекистон ва Қозоғистон давлатларини боғловчи чегара ҳудудда (Ғишткўприк–Жібек жоли) 2021 йилнинг 10 апрель куни «Марказий Осиё» халқаро савдо иқтисодий ҳамкорлик марказига тамал тоши қўйиш маросими ўтказилди. Тадбирда Ўзбекистон бош вазири Абдулла Арипов ва Қозоғистон бош вазири Асқар Мамин иштирок этди. Бу ҳақда Ўзбекистон ҳукумати матбуот хизмати хабар қилди.

Тадбирда сўнгги йилларда икки давлат раҳбарларининг ўзаро ишонч ва дўстликка асосланган самимий, илиқ муносабатлари туфайли мамлакатлар ўртасида яхши қўшничилик ва стратегик шериклик алоқалари янада мустаҳкамланиб бораётгани, президентларнинг ташаббуслари ва сиёсий иродалари туфайли кўп қиррали ҳамкорлик алоқалари янги босқичга кўтарилиб, ўзаро манфаатли лойиҳалар билан бойитилаётгани таъкидланди.

Марказий Осиёда ягона бўлган ушбу лойиҳа нафақат икки томон учун самарали бўлиши, балки минтақада савдо-иқтисодий алоқалар ривожига ҳам қўшимча туртки бериши таъкидланди.

Қозоғистонга ташриф доирасида олий даражада эришилган келишувларни амалга ошириш юзасидан ўзаро фикр алмашиш ва икки томонлама ҳамкорликнинг кейинги босқичларини муҳокама қилиш мақсадида икки мамлакат ҳукуматлари делегациялари иштирокида ишчи йиғилиши ҳам ўтказилди.

Йиғилишда қардош халқлар манфаатлари йўлида савдо-иқтисодий, транспорт-логистика, қишлоқ хўжалиги ва бошқа соҳаларда эришилган келишувларни изчил амалга оширишнинг мақбул йўллари муҳокама қилинди.

Бундан аввал Абдулла Арипов Тошкентга келган Россия, Беларусь, Қирғизистон, Тожикистон, Қозоғистон, Озарбайжон делегациялари раҳбарларини қабул қилгани ҳақида хабар берилганди.