17 март куни Тошкент шаҳри Олмазор туманида 51 ёшли Дониёр исмли эркак 46 ёшли Баҳодирга автомашина олди-сотдиси билан шуғулланишини айтиб, унинг 63 минг долларини қўлга киритган, деб хабар беради Тергов департаменти.
Маълум қилинишича, у Баҳодирга қисқа фурсатда иккита Captiva-4 русумли автомашина олиб беришни ваъда қилган ва ундан олган 63 минг долларни ўз эҳтиёжлари учун сарфлаб юборган.
Мазкур ҳолат юзасидан Олмазор тумани бўйича ИИО ФМБ ҳузуридаги Тергов бўлинмаси томонидан Дониёрга нисбатан Жиноят кодексининг 168-моддаси 4-қисми «а» банди (фирибгарлик, яъни алдаш, ишончни суиистеъмол қилиш йўли билан ўзганинг мулкини жуда кўп миқдорда қўлга киритиш) билан жиноят иши қўзғатилган.
Ҳозирда тергов ҳаракатлари олиб борилмоқда.
Аввалроқ Бухорода фуқарони ишга жойлаштириш эвазига 700 доллар пора талаб қилган катта ҳамшира қўлга олингани, Сардоба сув омбори тошқинидан фойда кўрмоқчи бўлган фирибгар 3,5 йилга қамалгани ҳамда Самарқандда пулларини кўпайтириб беришини айтиб, фуқаролардан 22 250 долларгача пул олиб, қайтариб бермаган компания аниқлангани ҳақида хабар берилганди.
Изоҳ (0)