Миллиардер Илон Маск коронавирусга қарши вакциналарни қўллаб-қувватлашини айтди. Лекин у аввалроқ вирусга қарши эмланмаслигини маълум қилган эди, деб ёзмоқда «РИА Новости».
2020 йилнинг сентябрь ойида The New York Times газетасининг Sway подкастида Илон Маск вакциналар чиқарилгач, ўзи ва оиласининг коронавирусга қарши эмланмаслигини айтган эди. Маск коронавируснинг унга ва фарзандларига хавф солмаётганини таъкидлаган, лекин 2020 йил у коронавирус инфекцияси билан касалланган.
«Аниқлик киритмоқчиман, мен вакциналарни тўлиқ, коронавирус вакциналарини эса қисман қўллаб-қувватлайман. Илм-фаннинг асоси аниқ. Фақат баъзи ҳолларда аллергик таъсирлар пайдо бўлади, лекин буни EpiPen (инъекция) ёрдамида осон ҳал этиш мумкин», — деб ёзган Маск ўзининг Twitter саҳифасида.
Аввалроқ Маск АҚШда COVID-19 пандемияси сабабли қўйилган чеклов чораларини муддатидан олдин бекор қилишга чақирувчи бир қатор баёнотлар берди ва коронавирусга нисбатан ваҳима қилишни аҳмоқлик деб атаганди.
Илон Маск Endeavor Group ҳолдинг директорлар кенгашига номзод қилиб кўрсатилгани ва Tesla маҳсулотлари учун биткоинлар билан тўлаш имкониятини қўшгани ҳақида хабар берилган эди.
Изоҳ (0)