Amerikalik tadbirkor, Tesla va SpaceX kompaniyalarining asoschisi Ilon Mask Endeavor Group holding direktorlar kengashiga nomzod qilib ko‘rsatildi. Bu haqda Tengrinews xabar berdi.

Foto: Sputnik

Holding AQShning qimmatli qog‘ozlar bo‘yicha komissiyasiga (SEC) kerakli hujjatlarni topshirdi. Guruhning bayonotiga ko‘ra, Mask holding direktorlar kengashiga kiritiladi. Bu tayinlov IPO (initial public offering — aksiyalarning boshlang‘ich ommaviy taklifi) uchun narx belgilash davrida yoki undan oldin ham bo‘lishi mumkin.

Endeavor Group aralash yakkakurash bo‘yicha UFC turniri va “Koinot go‘zali” (Miss Universe) tanlovining ta’sischisi hisoblanadi. Uning asoschisi Gollivudning eng mashhur prodyuserlaridan biri Ari Emanuel bo‘lib, u ko‘p yillar davomida Maskning muxlisi bo‘lgan.

Qator birlashishlar natijasida kompaniya ommaviy axborot vositalari va ko‘ngilochar dasturlar konglomeratiga (iqtisodiyotning turli sohalarida tadbirkorlik faoliyati bilan shug‘ullanadigan kompaniyalar birlashmasi) aylandi. Kompaniya UFC, Miami Open, New York Fashion Week, Frieze san’at yarmarkasi va “Koinot go‘zali” xalqaro tanloviga egalik qiladi va boshqaradi.

“O‘zining jamoat kompaniyasini boshqarish bo‘yicha professional tajribasi, avvalgi boshqaruv lavozimlari, boshqa jamoat kompaniyalari kengashlaridagi faoliyati va biznesni yo‘lga qo‘yish, rivojlantirish hamda integratsiyalashdagi ko‘nikmalari uchun Mask bizning direktorlar kengashimizga a’zo sifatida tanlandi”, — deyiladi kompaniya xabarida.

Ta’kidlanishicha, Emanuel oilasi Mask bilan birinchi marta hamkorlik qilmayapti. Agentning o‘zi Tesla faoliyatining dastlabki bosqichida kompaniya muxlisiga aylangan va kompaniya ishlab chiqargan Roadster elektromobilining ilk nusxalaridan biriga buyurtma bergan.

Avvalroq Ilon Mask bosh direktor unvoniga kompaniyaning “texnoqiroli” unvonini qo‘shib qo‘ygani haqida xabar berilgan edi.

Shuningdek, Tesla markasining kapitalizatsiyasi 605 milliard dollarga yetib, dunyodagi eng qimmat avtomobil kompaniyasiga aylandi va 24-mart kuni o‘z mahsulotlari uchun bitkoinlar bilan to‘lash imkoniyatini qo‘shdi.