Forbes jurnali eng boy odamlarning an’anaviy reytingini e’lon qildi. Ilon Mask unda 29 pog‘ona yuqoriladi

Forbes 2021-yil bo‘yicha dunyoning eng boy insonlari ro‘yxatini e’lon qildi. Birinchi o‘rin 2020-yildagi kabi Amazon asoschisi Jeff Bezosga nasib etdi. Bir yil davomida uning boyligi 113 milliard dollardan 177 milliard dollarga o‘sgan, deb yozadi Meduza.

Reytingning ikkinchi qatorida 151 milliard dollarlik boyligi bilan Tesla va SpaceX asoschisi Ilon Mask turibdi. Bir yil oldin u eng boy ishbilarmonlar ro‘yxatida atigi 31-o‘rinda turgan va reytingni tuzuvchilar uning boyligini 24,6 milliard dollarga baholagan edi.

Uchinchi o‘rinni 150 milliard dollar bilan Louis Vuitton Moet Hennessy rahbari Bernard Arno egalladi. Bir yil oldin Arno to‘rtinchi o‘rinda edi, o‘shanda Forbes uning boyligini 76 milliard dollarga baholagan.

Taniqli investor Uorren Baffet so‘nggi 20 yil ichida birinchi marta “top beshlik”dan tushib ketdi. Garchi uning boyligi 67,5 milliarddan 96 milliard dollarga o‘sgan bo‘lsa-da, unga oltinchi o‘rin nasib qildi.

Forbes qayd etganidek, reyting ishtirokchilarining umumiy boyligi, dunyo bo‘ylab pandemiya va iqtisodiy muammolarga qaramay, rekord darajadagi 8 trillion dollarga o‘sib, 13,1 trillion dollarni tashkil etdi. Ro‘yxatning yuqori pog‘onasidan joy olganlarning aksariyati texnologik kompaniya egalaridir.

So‘nggi bir yilda boyligi keskin o‘sgan ishbilarmonlar orasida Telegram asoschisi Pavel Durov ham bor. U reytingda 565-o‘rindan 112-o‘ringa ko‘tarildi. Forbes ma’lumotlariga ko‘ra, Durovning boyligi 3,4 milliarddan 17,2 milliard dollarga o‘sgan. Shu bilan birga, nashr Durovni Birlashgan Arab Amirliklari vakili deb hisoblaydi. Eng boy rossiyalik tadbirkor esa Aleksey Mordashov bo‘lib, u 29,1 milliard dollar boyligi bilan reytingda 51-o‘rinni egalladi (bir yil oldin 54-o‘rinda edi).

Reyting ishtirokchilarining boyligini baholash uchun ularga tegishli aksiyalarining 5-mart holatiga ko‘ra qiymati asos qilib olindi.

Forbes yillik reytingdan tashqari, dunyoning eng boy ishbilarmonlari boyligidagi o‘zgarishlarni real vaqt rejimida kuzatib boradi. Ushbu reytingda Mask anchadan beri yetakchilar qatorida bo‘lib kelmoqda.