Bloomberg: АҚШ россиялик дипломатларни мамлакатдан чиқариб юбориши ва Москвага қарши янги санкциялар киритиши мумкин

АҚШ ҳукумати россиялик дипломатларни мамлакатдан чиқариб юбориш ҳамда хакерлик ва сайловларга аралашувда айбланаётган Москвага қарши янги санкциялар киритиш ҳақида ўйламоқда. Бу ҳақда Bloomberg агентлигига асосланиб, «РБК» хабар берди.

Агентлик хабарига кўра, Оқ уй Москвадаги тахмин қилинган душманлик ҳаракатлари ҳамда Американинг Solar Winds компанияси томонидан ишлаб чиқилган дастурий таъминот ёрдамида давлат идораларига уюштирилган хакерлик ҳужумига оид маълумотларни ўрганишни якунлади.

Агентлик суҳбатдошларидан бирининг сўзларига кўра, АҚШнинг жавоб чоралари бир нечта элементларни, жумладан, «дипломат ниқоби остида ишлайдиган разведка ходимларини» мамлакатдан чиқариб юбориш, Россия президенти Владимир Путинга яқин одамларга, шунингдек, сайловларга аралашиш билан боғлиқ ҳукумат амалдорларига қарши санкциялар қўллашни ўз ичига олиши мумкин.

Оқ уй ва Давлат департаменти бу хабарларга изоҳ беришдан бош тортди.

Москва, ўз навбатида, АҚШнинг ҳар қандай душманлик ҳаракатларига жавоб қайтаришини маълум қилди.

«Биз дўстона шаклда бўлмаган ҳар қандай қадамларга жавоб берамиз, бу ўз-ўзидан равшан. Ҳозирча мен АҚШнинг бирорта аниқ қарорини кўрмадим, ҳали ҳеч нарса эълон қилинмади», — деди Россия ташқи ишлар вазири Сергей Лавров Bloomberg нашрининг хабарларига жавобан.

Лавров АҚШ Россиянинг душманлик ҳаракатларини кўриб чиқишни якунлагани ҳақидаги хабарларни ўқиганини қўшимча қилди. «Улар текширувни қандайдир тарзда жуда тез якунлади, одатда АҚШ бизни шу қадар кўп гуноҳларда айблайдики, уларни бир неча ҳафта, ҳатто бир неча ой ичида ўрганиб чиқиш мушкул, лекин улар қарор қилишга улгурибди. Эшитишимча, АҚШ бизни бошқача йўллар билан ҳам жазоламоқчи», — деди вазир. Лавровнинг сўзларига кўра, Вашингтоннинг Москвага ёндашуви «боши берк кўчада, балки ундан ҳам аҳмоқона шаклда». Вазир «бу санкциялар жорий этилишидан кўзланган мақсадлар ҳеч қандай натижа бермайди», деб ҳисобламоқда

Bloomberg хабарига кўра, 7 апрель куни Оқ уйда юқори лавозимли амалдорларнинг йиғилиши бўлиб ўтиши ва эҳтимолий чораларни муҳокама қилиш режалаштирилган эди. «Байден ва унинг бош ёрдамчилари Россияни қандай қаттиқ жазолаш кераклигини аниқлаб олиши керак, шу билан бирга, улар Эрон ядровий битими ҳамда иқлим ўзгаришига қарши кураш бўйича Москванинг ёрдамига муҳтож бўлади. Бундан ташқари, АҚШ Россия билан қуролларни бошқариш тўғрисидаги музокараларни қайта бошлашга интилмоқда», — дея қайд этди Bloomberg.