АҚШда Johnson & Johnson билан эмланганларда ножўя таъсирлар пайдо бўлгач, иккита вакцинация маркази ёпилди

АҚШда Johnson & Johnson вакцинаси билан эмланган бир неча кишида ножўя таъсирлар кузатилганидан кейин Шимолий Каролина ва Колорадо штатларидаги иккита оммавий вакцинация марказлари вақтинчалик ёпилди. Бу ҳақда The Wall Street Journal маълумотларига таяниб, «РБК» хабар берди.

Лекин ушбу ножўя таъсирларнинг вакцина билан бевосита боғлиқлиги ҳали тасдиқланмади.

Шимолий Каролинада 18 нафар эмланганларда вакцинанинг ножўя таъсири пайдо бўлгач, вакцинация марказининг фаолияти тўхтатилди. Уларнинг 14 нафарида ножўя таъсирлар сезиларли даражада бўлмаган. Johnson & Johnson компанияси билан маслаҳатлашгач, минтақавий соғлиқни сақлаш бошқармаси марказни вақтинчалик ёпишга қарор қилди.

Колорадода ҳам 11 кишида ножўя таъсирлар кузатилганидан кейин, вакцинация марказининг фаолияти тўхтатилди. Уларнинг икки нафари шифохонага ётқизилиб, аҳволи назорат қилинмоқда.

Johnson & Johnson вакилининг The Wall Street Journal’га маълум қилишича, компания эмланганлардаги ножўя таъсирлар билан боғлиқ барча ҳолатларни диққат билан ўрганмоқда, барча ҳисоботлар АҚШнинг Озиқ овқат ва дори-дармон назорати агентлиги (FDA), шунингдек, бошқа соғлиқни сақлаш органларига юборилади.

Америка ҳукумати Johnson & Johnson вакцинасини февраль ойининг охирида маъқуллаган эди. Бу препарат билан фақат 18 ёшдан юқори бўлганларни эмлаш мумкин. Вакцина фақат битта компонентдан иборат бўлиб, эмлаш учун битта дозанинг ўзи етарли. Ўшанда FDA вакцинанинг фойдаси унинг эҳтимолий хавфидан кўпроқ эканини таъкидлаган.

Апрель ойининг бошида The New York Times ва Bloomberg нашрлари Балтимордаги Johnson & Johnson заводида коронавирусга қарши вакцинанинг 15 миллион дозаси ишлаб чиқариш мобайнида бузилганини хабар қилган эди. Компаниянинг ўзи препаратнинг ўша партияси сифат текширувидан ўтмаганини маълум қилган.

АҚШнинг Касалликларни назорат қилиш ва олдини олиш марказининг (CDC) маълум қилишича, 7 апрель ҳолатига кўра, мамлакатда коронавирусга чалиниш билан боғлиқ 74 860 та янги ҳолат рўйхатга олинди ва касалланганларнинг умумий сони 30,7 миллионга етди.

Ўтган бир кун давомида 871 киши коронавирус қурбонига айланди ва шу билан пандемия давомида вирусга чалиниб вафот этганлар 566 106 нафарга етди.