Навоий вилояти Кармана туманида Isuzu юк машинаси пиёдани уриб кетди, дея хабар қилмоқда ЙХҲББ.
Қайд этилишича, 2021 йилнинг 1 апрель куни тонгги соат 04:40 лар атрофида Кармана тумани ҳудудидан ўтган 4К-364 давлат аҳамиятига эга бўлган автомобиль йўлининг 23-километрида 35 ёшли 17 йиллик ҳайдовчилик тажрибасига эга бўлган ҳайдовчи Isuzu русумли юк машинасида Жалойир—Зарафшон йўналишида ҳаракатланиб келаётган вақтида 46 ёшли пиёдани уриб юбориб, йўл-транспорт ҳодисаси содир этган.
ЙТҲдан сўнг ҳайдовчи пиёдага ёрдам бермасдан қочиб кетган. Шифохонага олиб борилган жабрланувчи ўша ерда вафот этган.
Туман тиббиёт бирлашмасининг бирламчи маълумотларига кўра, пиёда спиртли ичимлик таъсирида эканлиги аниқланган. Фуқаро маст ҳолда ҳаракатларини бошқара олмаслиги оқибатида ўз мувозанатини йўқотиб, йўлнинг белгиланмаган қисмига чиқиб кетган.
Ҳозирда мазкур ҳолат юзасидан Кармана тумани ИИБ тергов бўлими томонидан терговга қадар суриштирув ҳаракатлари олиб борилмоқда.
Бундан аввал Наманганда йўлдан ўтаётган мактаб ўқувчиларини босиб кетишига бир бахя қолган Lacetti ҳайдовчиси жаримага тортилгани, Тошкентда бешта автомобиль иштирокида ЙТҲ содир бўлгани ҳамда Қорақалпоғистонда Cobalt йўл четидаги бетонга урилиши оқибатида машина ҳайдовчиси вафот этгани ҳақида хабар берилганди.
Изоҳ (0)