GRToyota компанияси 2012 йилда тақдим этилган GT 86’нинг авлоди — GR 86 спорткарини тақдим этди. Янги модель Toyota Gazoo Racing ва Subaru ҳамкорлигида яратилган ҳамда иккинчи авлод BRZ купеси билан унификация қилинган, деб хабар беради Motor.
2020 йилнинг кузида тақдим этилган Subaru BRZ ва Toyota спорткупесининг ташқи кўринишида олд ҳамда орқа бамперлари фарқ қилади, моделларнинг кузов панеллари эса бир хил. BRZ каби индекси GR 86’га ўзгаргач, спорткар олдинги платформасини сақлаб қолган. Икки эшикли Toyota’нинг ғилдираклар базаси беш миллиметрга, кузовининг узунлиги 30 миллиметрга ошган, баландлиги эса 10 миллиметрга қисқарган. Машинанинг ости ва йўл юзаси орасидаги масофа 130 миллиметрни ташкил этади, ғилдираклар ўлчами — 18 дюйм.
Машинанинг оғирлиги 50 килограммга ошиб, «механика» версиясида 1270 килограммга етган. Қанот ва том қисми алюминийдан ишланмаганида, шунингдек, ўриндиқлар енгиллаштирилмаганида машина бундан ҳам оғирроқ бўлиши мумкин эди. Компаниядагиларнинг таъкидлашича, баландликнинг қисқартирилиши ва оғирликнинг яхши тақсимланиши «фавқулодда паст» оғирлик марказини ҳамда яхши манёврчанликни таъминлаган.
Спорткар салонида диагонали етти дюймга тенг виртуал қурилмалар панели пайдо бўлган, Apple CarPlay ва Android Auto протоколларини қўллаб-қувватловчи мултимедиа тизими эса саккиз дюймли экранга жойлаштирилган. Бундан ташқари, GR 86 Subaru’нинг EyeSight хавфсизлик тизимига эга бўлган — у автомат версия билан тақдим этилади.
Техник жиҳатдан GR 86 ва Subaru BRS тўлиқ унификация қилинган. Toyota’нинг янги моделига ҳам 235 от кучини тақдим этишга қодир 2,4 литрли мотор ўрнатилган. Машина соатига 100 километр тезликка 6,3 сонияда эришади.
Мавзуга доир: Японлар энг тежамкор автомобиллар рейтингини эълон қилди
Изоҳ (0)