Hyundai компанияси Ҳиндистон бозори учун Creta’нинг етти ўриндиқли версиясини Alcazar номи остида тақдим этишга тайёрланмоқда. 6 апрелга режалаштирилган тақдимотда Жанубий Корея компанияси янги моделнинг расман биринчи видеоси билан бўлишди, деб хабар беради Motor.
Янги ролик Alcazar Hyundai Creta’нинг узайтирилган версияси эканлигини тасдиқлайди. Бунга қадар эълон қилинган тизерда Alcazar’нинг C-симон шаклдаги орқа фаралари унинг Creta’дан фарқини яққол кўрсатиб қўйган эди. Бундан ташқари, янги модель радиатор панжараси билан тўлдирилган ўзгача олд бампер ва орқа қора устунчаларга эга бўлган.
Hyundai Alcazar икки хил версияда тақдим этилади: олти ва етти ўриндиқли. Биринчи узайтирилган кроссовер иккинчи қаторда «капитан» ўриндиғига эга бўлади, етти ўриндиқли модель эса суянғичи 60:40 пропорцияда йиғиладиган диван билан жиҳозланади.
Тахминларга кўра, Hyundai Alcazar салонига виртуал қурилмалар панели ва 10,25 дюймли мултимедиа тизимига эга сенсорли дисплей ўрнатилади. Салонидаги ранглар фарқи, бироз ўзгартирилган марказий туннел, шунингдек, иккинчи қатордаги йўловчиларнинг гаджетлари учун мўлжалланган симсиз қувватлантиргич янги моделнинг ўзига хос жиҳатига айланади.
The Indian Car News маълумотларига кўра, ушбу модель Ҳиндистон Creta’си билан мотор гаммасини тўлиқ бўлишмайди. Бензин вариантли версиясига 152 от кучи ва 192 Нм айланувчи моментни тақдим этишга қодир тўрт цилиндрга эга 2,0 литрли мотор ўрнатилади.
115 от кучи ва 250 Нм айланувчи моментни тақдим этувчи 1,5 литрли дизель мотор Alcazar учун муқобил вариантга айланиши мумкин. Бу каби двигатель оддий Creta’га ўрнатилган, бироқ оғирроқ модель учун у қайта созланади. Трансмиссия — олти поғонали «механика» ёки автоматик қути.
Hyundai Alcazar премьераси 6 апрель куни бўлиб ўтади, кроссовер Ҳиндистон бозорига 2021 йил охирида чиқиши кутилмоқда.
Аввалроқ Hyundai компанияси футуристик ташқи кўринишга эга янги Staria минивенини яратаётгани тўғрисида хабар берилганди.
Изоҳ (0)