«Avto.ru» сайтида 1964 йилда ишлаб чиқарилган ва реставрациядан сўнг, идеал ҳолатда бўлган «ГАЗ-21» сотувга қўйилгани тўғрисида эълон пайдо бўлди. 21 минг километр йўл босган ёрқин седан 6,9 миллион рублга (90 минг доллар) баҳоланмоқда. Бу пулга янги BMW Х6 харид қилиш мумкин, деб ёзади Motor.
Эълонда кўрсатилишича, 57 йиллик «Волга» худди конвеердан янги чиққан ҳолда ва ўзининг барча оригинал эҳтиёт қисмларини сақлаб қолган. Сотувчининг сўзларига кўра, седанга ҳозирга қадар икки кишигина эгалик қилган ва улар машинани ҳеч қачон қишда ҳайдамаган. Ҳозирда ноёб автомобиль Гусь-Хрустальний шаҳрида ўзининг янги хўжайинини кутмоқда.
Сотувга қўйилган седан 1962 йилдан 1970 йилга қадар ишлаб чиқарилган «ГАЗ-21»нинг учинчи сериясига тааллуқли. Ўзидан олдинги аждодларидан у бамперларининг кўриниши ва 37 та устунчага эга радиатор панжараси билан фарқ қилади. Машина салонида янги материаллар пайдо бўлган: том қисми сунъий чарм билан, ўриндиқлар янги ярим синтетик матолар билан қопланган.
«Волга»нинг 2,5 литрли мотори 75 от кучини тақдим этишга қодир ва агрегат механик узатмалар қутиси ёрдамида бошқарилади. Бошқа янгиликлари қаторидан телескопик амортизаторлар ва анча бардошли кузов эмалига эга бўлган.
Аввалроқ Россияда саккиз йил давомида реставрация қилинган 55 йиллик «Волга» сотувга қўйилгани, Москвада 13 йил гаражда сақланган «ВАЗ-2107» 13,5 минг долларга баҳолангани тўғрисида хабар берилганди.
Изоҳ (0)