Мисрлик 29 ёшли Марва Элселехдар Мисрдаги биринчи аёл капитан бўлди. Шундан сўнг ижтимоий тармоқларда Сувайш каналининг тўсиб қўйилишида айнан у айбдор экани ҳақида миш-мишлар тарқалди, деб ёзади Meduza.
Марва болалигидан денгизни яхши кўради. Акаси сингари у ҳам Искандариядаги Араб Фан, технология ва денгиз транспорти академиясига (AASTMT) ўқишга кирди. Марва халқаро транспорт ва логистика факультетида таҳсил олишни бошлаган. Бироз вақт ўтгач, у акаси ўқиган Денгиз транспорти ва технологияси факультетига кўпроқ қизиқишини англади. Аммо факультетга фақат эркаклар қабул қилинарди.
Марва барибир ушбу факультетга ўтиш учун ариза топширди. Унинг аризасини кўриб чиқишдан олдин академия раҳбари Миср қонунчилиги аёлларга капитан лицензиясини беришга рухсат берадими ёки йўқлигини текширишни буюрди. Қонунчиликда рухсат берилиши аниқланди.
Марва факультет имтиҳонларини муваффақиятли топширди ва у ердаги 1200 нафар эркак талаба орасида ягона ва биринчи аёл бўлди. 2013 йилда ўқишни тамомлагач, Марва Миср денгиз хавфсизлиги маъмуриятига тегишли «Аида IV» кемасининг иккинчи ёрдамчи капитани бўлиб иш бошлади. Кема Қизил денгиздаги маёққа озиқ-овқат маҳсулотлари етказиб беради, шунингдек, ундан AASTMT талабаларининг ўқув машғулотларида фойдаланилади.
2015 йилда «Аида IV» кенгайтирилган Сувайш каналидан биринчи марта сузиб ўтганида, Марва қўмондонлик штаби аъзоси сифатида кема бошқарувида иштирок этган. У ушбу каналдаги араб мамлакатларининг энг ёш ва биринчи аёл капитани бўлди.
«Жамиятимиз ҳалигача қизларнинг денгизда ишлаши ҳақидаги фикрларни қабул қилмайди»
2021 йил 23 мартда Ever Given контейнер ташувчи кемаси Сувайш каналига тиқилиб, кемалар ҳаракатини тўсиб қўйганидан сўнг интернетда кемани айнан Марва бошқаргани ҳақида миш-мишлар тарқалди. Аслида эса Марва капитаннинг биринчи ёрдамчиси сифатида ҳалиям «Аида IV»да хизмат қилмоқда.
Ижтимоий тармоқларда Arab News нашрининг Марва ҳақида ёзган мақоласи скриншоти тарқала бошлади. Мақола ҳақиқий эди, аммо сарлавҳаси Мисрнинг биринчи аёл капитани Сувайш каналининг блокланишига алоқадор, дея ўзгартириб қўйилган эди. Худди шундай маълумотлар Twitter’да Марва номидан очилган учта сохта аккаунтлар орқали тарқатилиб, бир неча соат ичида 20 минг обуначини тўплади. Марва ўз Instagram саҳифаси ва оммавий ахборот воситаларида мазкур маълумотларни рад қилди.
Марва BBC News’га ким ва нима мақсадда у ҳақида ёлғон маълумот тарқатганини билмаслигини айтди. «Бу соҳада муваффақиятга эришган аёл бўлганим ёки мисрлик бўлганим сабабли менга ‘ҳужум’ уюштирилган бўлиши мумкин деб ўйлайман. Аммо аниқ билмайман», — деди у.
Илгари Марва денгиз саноатида ишлаётганларнинг атиги 2 фоизини аёллар ташкил этишини ва у ўқиш пайтида ҳам, иш пайтида ҳам гендер тенгсизлигига дуч келганини айтган. Масалан, у потенциал иш берувчилардан рад жавобини олган, чунки уларнинг аксарияти аёлларни бортга олиб чиқишни хоҳламаган.
«Бизнинг жамиятимиз ҳалигача қизларнинг ўз оиласидан олис денгизда узоқ вақт давомида ишлаши ҳақидаги фикрларни қабул қилмайди», — деб қўшимча қилди Марва BBC News’га.
Марва аввалига кемаси Сувайш каналини тўсиб қўйгани ҳақидаги миш-мишлар унинг обрўсига путур етказиши ва карьерасини бузиши мумкинлигидан қўрққан. Аммо салбий изоҳлар билан бирга у кўплаб ижобий фикрларни олди ва эътиборини айнан уларга қаратишга қарор қилди. «Шуни таъкидлаш жоизки, мен аввалгидан ҳам машҳур бўлиб олдим», — деди Марва. Май ойида у тўла-тўкис капитан унвонини олиш учун сўнгги имтиҳонини топширади.
Аввалроқ Сувайш каналининг тўсилиб қолиши оқибатида етган зарар 1 миллиард долларга баҳолангани ҳақида хабар берилганди. Канал маъмурияти бўлиб ўтган ҳодисада Ever Given кемаси капитанини айбдор деб топди. Кеманинг эгаси эса ишни судга оширмаслик учун зарарни қоплаб бермоқчилигини маълум қилди.
Изоҳ (0)